«Ёсць пазіцыя Лукашэнкі, што мы не баімся, мы ўтром нос астатнім. Што смяротнасць у Беларусі будзе не большая, а можа і меншая ў параўнанні з тымі краінамі, што ўвялі жорсткі каранцін», – тлумачыць палітолаг Валер Карбалевіч.
Лукашэнка таксама рызыкуе захварэць, але пры неабходнасці ён будзе лекавацца ў Рэспубліканскім клінічным медычным цэнтры Кіравання справамі прэзідэнта. Цэнтр месціцца ў Ждановічах, адчынілі яго ў 2018 годзе. Лекавацца там могуць людзі з адмысловага «пераліку». Са словаў галоўнай доктаркі цэнтру Ірыны Абельскай, гэта чыноўнікі і тыя, хто гатовы плаціць за паслугі медыкаў.
«Ніякіх ведамасных лякарняў быць не павінна, ніякіх спецыяльных, VIP для чыноўнікаў быць не павінна. Яны павінны лячыцца ў такіх жа лякарнях, што і любы просты чалавек. Гэта звычайная практыка ў любых нармальных краінах», – адзначае доктар Аляксандр Уэльскі.
На адкрыцці прэзідэнт адзначыў: цэнтр даступны звычайным беларусам. Але спадарыня Наталля туды трапіць не здолела.
«Патэлефанавала туды, і супрацоўніца мне сказала, што я не змагу набыць ніякіх паслуг», – распавяла Наталля Гарачка.
Праз 10 хвілінаў размовы высветлілася: трапіць у лякарню магчыма. Кошт медычнага абслугоўвання на год – 2300 долараў. Але спачатку трэба прыйсці на размову да галоўнай доктаркі і атрымаць даведку з псіханеўралагічнага ды наркалагічнага дыспансераў.
VIP-палата і абсталяванне коштам $ 2,5 млн
Падчас кіравання Лукашэнкі прэс-служба прэзідэнта аднойчы паведаміла пра тое, што прэзідэнту зрабілі планавую аперацыю на левым каленным сугломе. І быццам больш сур’ёзных праблемаў са здароўем беларускі лідар не мае. Аднак нельга забываць пра 65-гадовы ўзрост і схільнасць да пэўных хваробаў.
«Гэта цукровы дыябет, гэта ІХС, гэта сардэчна-сасудзістыя захворванні, абменныя працэсы і гэтак далей. Рызыкі значна вышэйшыя ў пажылым узросце», – падкрэслівае доктар Аляксандр Уэльскі.
Лекаваць пры неабходнасці Лукашэнку будзе Ірына Абельская, галоўная доктарка прэзідэнцкага цэнтру. Ейны родны брат, Андрэй Пастаялка, працуе пры сястры хірургам. Што да абсталявання, у цэнтры ёсць спецыяльны амерыканскі рабатычны комплекс. Робат, які дапамагае рабіць аперацыі, каштаваў у 2017 годзе, падчас закупу абсталявання для клінікі, каля $ 2,5 млн. У 2018 годзе Абельская зазначыла: большасць абсталявання цэнтру не мае аналагаў у краінах СНД.
«Што датычыць медабсталявання, так, медабсталяванне ў гэтых клініках заўсёды таксама адрознівалася ад астатніх клінік у лепшы бок», – адзначае і доктарка Алена Церашкова.
VIP-палата прэзідэнта – гэта трохпакаёвы нумар плошчай 100 кв. м, дзве працоўныя зоны для сустрэчаў, абстаўленыя пэўным чынам, каб па той бок аб’ектыву ніхто не здагадаўся, што прэзідэнт у лякарні. Ёсць у нумары гардэробная і нават купальня.
Лукашэнка кажа, што ніколі ў якасці пацыента ў цэнтры не быў. І ўсё больш дае ўласныя парады, як лекавацца пры розных хваробах. Ад плоскаступнёвасці – вайсковая служба, ад алкагалізму – поле, ад каронавіруса – гарэлка ды лазня.
«Любую інфармацыю можна пачуць ад чалавека, які не ведае, што гаворыць. Не ягоная задача быць экспертам у медыцыне. Ягоная задача – кіраваць краінай пры дапамозе кампетэнтных людзей», – каментуе парады прэзідэнта доктарка Алена Церашкова.
Тым часам у Беларусі няма аніводнага лімфолага. З краіны штогод за мяжу з’язджаюць больш за 200 дактароў. Лукашэнка схіляе звычайных беларусаў да народных метадаў лекавання, тады як сам мае доступ да выключнага абслугоўвання.
А ў Беларусі Ірына Абельская яшчэ ў 2016 годзе падкрэслівала выключнасць «лакшары-лячэння» – кліенты клінікі жывуць на 8 гадоў даўжэй за тых, хто атрымоўвае дапамогу ў звычайных айчынных установах.
Прэферэнцыі пры гэтым не датычаць дзяцей і інвалідаў. Іх у цэнтры, пабудаваным на сродкі падаткаплатнікаў, нават за грошы проста не абслугоўваюць.
Нягледзячы на VIP-палаты і абсталяванне, часам высокапастаўленыя чыноўнікі аддаюць перавагу не прэзідэнцкай клініцы, а замежным медычным цэнтрам. Так, аперацыю на сэрцы ў Расейскім інстытуце клінічнай кардыялогіі рабіў Анатоль Рубінаў. А Людміла Пастаялка – экс-міністарка аховы здароўя і па сумяшчальніцтве маці Ірыны Абельскай – лётала на лекаванне ў Германію і Аўстрыю.
Таксама ў праграме «Асабісты капітал»:
- Крызіс перажывуць не ўсе
- Як набыць якасныя саджанцы
- Чым замяніць штучныя кветкі на Радаўніцу
Глядзіце праграму «Асабісты капітал» кожны панядзелак а 19:00 на тэлеканале «Белсат», а таксама онлайн на нашым сайце. Далучайцеся да нашых старонак ў Facebook ды Одноклассниках. Падпісвайцеся на нашу рассылку і раз на месяц вы будзеце атрымліваць ліст з чатырма найбольш карыснымі сюжэтамі «Асабістага капіталу».
Калаж з фота: Pyotr Sivkov / TASS / FORUM
