У новым выданні шоу «Я не буду гэтага есці» абмяркоўваем беларускую кухню, рэстаранны бізнес і гатуем смачны фасолевы суп.
У праекце «Я не буду гэтага есці» вядомыя людзі дзеляцца з намі сваймі кулінарнымі траўмамі: распавядаюць, да якой стравы не могуць дакрануцца і чаму. Задача нашых шэф-кухараў Вольгі Прыгаравай і Аляксандра Чыкілеўскага змяніць рэцэпт так, каб наш герой з’еў усё да апошняй лыжкі ды папрасіў яшчэ. Напрыканцы праграмы госць абірае пераможцу кулінарнай бітвы.
Герой гэтага выдання – наш калега Глеб Лабадзенка. Ён вядзе на «Белсаце» ток-шоу «Кожны з нас», а таксама праграму «Мова нанова», якая з’явілася ўслед за аднайменнымі курсамі беларускай мовы. Адна з улюбёных страваў Глеба (і адзіная, якую ён умее гатаваць) – гэта дранікі. А не любіць ён, як вы ўжо здагадаліся, фасолевы суп. У дзяцінстве, паводле ягоных словаў, яго ім перакарміла мама.
«З ім усё не так, на маю думку. Ён не таго колеру – брыдкага. Не той кансістэнцыі, ён пахне абы-як. Фасоля гэтая плавае. І потым аказалася, што гэта вельмі карысна. А тое, што карысна, – заўсёды нясмачна», – смяецца Глеб.
Цягам здымачнага дня ён імкнецца нічога не есці: «Па-першае, ёсць прымаўка “Сытае бруха да навукі глуха”. Па-другое, калі ты наеўся, ад хвалявання можа здарыцца ўсё што заўгодна».
Дарэчы, у студыю «Я не буду гэтага есці» Глеб прыйшоў са сваёй жонкай Таццянай і калегам па працы – галоўным рэдактарам ток-шоу «Кожны з нас» Яўгенам Валошыным.
«Ці атрымлівае нехта ў Беларусі зоркі Мішлен? Ці можа свае нейкія – шыны Белшыны, напрыклад?» – задаўся пытаннем Яўген.
Аляксандр Чыкілеўскі удакладніў, што Беларусь не ўваходзіць у лік краін, па якіх выдае свае знакамітыя даведнікі кампанія «Мішлен». А ідэю з шынамі ацаніў. Як і Глеб Лабадзенка: «Я б яе Белшыне прадаў», – сказаў ён. Але ў нас на парадку дня – атрыманне ўмоўнай «зорачкі» ад галоўнага героя. Якім жа чынам нашыя шэф-кухары збіраюцца прышчапіць яму любоў да нелюбімай стравы?
Фасолевы суп у выкананні Аляксандра Чыкілеўскага будзе ў выглядзе пюрэ, а падасць ён яго, як французскі цыбульны: запечаны з грэнкамі і сырам. Вольга Прыгарава ў якасці альтэрнатывы прапанавала чылі кон карнэ – не зусім суп, але затое фасоля ў ім застанецца цэлай. А значыць, кажучы словамі Глеба Лабадзенкі, будзе «глядзець» на яго з талеркі – як раз гэтага ён і не любіць.
На 3 чалавекі
Час гатавання: 60 хвілін
Наразаем кубікамі цыбулю і часнык, перац чылі і балгарскі. Абсмажваем на алеі ў рондалі. Да абсмажанай гародніны дадаем ялавічны фарш і тушым хвілін 25. Затым туды ж дадаем вараную фасолю і памідоры ва ўласным соку. Гатуем усё разам яшчэ хвілін 7–10, даводзім да смаку соллю, перцам, молатым у ступцы кумінам.
Для падачы пасыпаем сечанай кінзы, дадаем смятану, побач кладзем тарцілью.
На 6 чалавек
Час гатавання: 45 хвілін (без уліку замочвання фасолі)
Замочваем фасолю на ноч, а затым варым да мяккасці.
Наразаем дробнымі кубікамі салеру, цыбулю, грудзінку, моркву, пастарнак і часнык. Абсмажваем грудзінку, каб яна пусціла тлушч. Дадаем да яе цыбулю, часнык, корань салеры, корань пастарнаку і моркву. Усе разам абсмажваем да гатовасці.
Прабіваем блендэрам фасолю з вадой, у якой яна гатавалася, да аднастайнасці. Пераціраем праз сіта. У фасолевае пюрэ дадаем абсмажаныя гародніну з грудзінкай. Уліваем вяршкі. Варым 5 хвілін. Дадаем стручковую фасолю і варым яшчэ 5 хвілін.
Бланшуем таматы (надрэзаць крыжыкам і абліць кіпенем), здымаем скурку і прыбіраем насенне. Мякаць памідораў наразаем. Кладзем у суп за 2–3 хвіліны да гатовасці.
Наліваем суп у глыбокую талерку. Зверху кладзем лустачку белага хлеба, пасыпаем сырам і запякаем у духоўцы пры тэмпературы 180–200 градусаў да залацістага колеру.
Чый варыянт перамог у кулінарнай бітве? Глядзіце новае выданне кулінарнага шоу «Я не буду гэтага есці» (відэа ў пачатку артыкула).
Шоу «Я не буду гэтага есці» глядзіце штонядзелю а 19:35 паводле менскага часу на тэлеканале «Белсат» праз спадарожнік «Astra 4A» (ранейшая назва «Sirius 4»), онлайн, на YouTube-канале «Белсат Life» або ў архіве на нашай старонцы.
Любіце гатаваць? Сачыце за абнаўленнямі на Facebook, у «Одноклассниках» і ў Instagram.
ІА, belsat.eu