У новым выданні шоу «Я не буду гэтага есці!» распавядаем, як смачна прыгатаваць ялавічнае лёгкае.
У праекце «Я не буду гэтага есці!» вядомыя людзі дзеляцца з намі сваймі кулінарнымі траўмамі: распавядаюць, да якой стравы не могуць дакрануцца і чаму. Задача нашых шэф-кухараў Вольгі Прыгаравай і Аляксандра Чыкілеўскага змяніць рэцэпт так, каб наш герой з’еў усё да апошняй лыжкі ды папрасіў яшчэ. Напрыканцы праграмы госць абірае пераможцу кулінарнай бітвы. І гэтым разам мы накіраваліся ў Кіеў скараць страўнікі ўкраінскіх зорак.
Гэтым разам да нас у студыю завітаў Ілья Кваша – скакун у ваду, бронзавы прызёр летніх Алімпійскіх гульняў 2008 года, сяміразовы чэмпіён Еўропы, трэнер папулярнага ва Украіне тэлешоу «Вышка».
Аказалася, ягоная кулінарная траўма – справа не далёкага дзяцінства, а візіту да бабулі ягонай жонкі Ілоны. Менавіта тады ён пакаштаваў варанае ялавічнае лёгкае, якое выглядала, як дробна парэзанае жэле незразумелага колеру, прысыпанае пасечанай залёнай цыбуляй.
«Але не пакаштаваць я не мог. Добра, што ў нейкі момант бабуля выйшла, а побач акурат бегалі сабакі», – узгадвае Ілья Кваша.
«Па смаку лёгкае – нешта сярэдняе паміж мясам і салам», – гаворыць Аляксандр Чыкілеўскі.
Ён вырашыў зрабіць з лёгкага начынку для картаплянікаў – традыцыйных беларускіх піражкоў. А Вольга Прыгарава замаскіруе лёгкае паніроўкай і падасць яго з вінным соусам.
Асновай для абедзьвюх страваў будзе варанае лёгкае, якое спачатку трэба каля дзвюх гадзін вымочваць у халоднай вадзе. Пасля – выдаліць буйныя пратокі. Рэжам невялікімі кавалачкамі, кладзем у рондаль, солім, заліваем халоднай вадой, даводзім да кіпення. Дадаем корань пятрушкі, моркву, цыбулю, лаўровы ліст, духмяны перац, памяншаем агонь, накрываем вечкам і пакідаем хвілін на 40, каб лёгкае згатавалася.
Картаплянікі з начынкай з сэрца і лёгкага, пададзеныя з капуснай салатай
Для адварвання субпрадуктаў
- цыбуля – 50 г
- морква – 50 г
- корань салеры – 50 г
- лаўровы ліст
- соль
- перац чорны гарошак
Для начынкі
- сэрца ялавічнае – 500 г
- лёгкае ялавічнае – 500 г
- цыбуля смажаная – 100 г
- морква смажаная – 70 г
- варанае яйка – 1 шт.
- масла сметанковае – 70 г
Для цеста
- вараная бульба – 500 г
- яйка – 1 шт.
- мука – 50 г
- масла сметанковае – 60 г
- алей – 60 мл
Для салаты
- капуста белакачанная – 250 г
- морква – 50 г
- соль
- цукар
- алей – 30 мл
- воцат – 20 мл
Вараную бульбу нацерці на дробнай тарцы, дадаць муку, яйка, спецыі і добра змяшаць. Загадзя зварыць сэрца і лёгкае. Астудзіць і дробна нарэзаць. Дадаць падсмажаныя цыбулю і моркву. Нацерці яйка, сметанковае масла і добра змяшаць.
З бульбяной масы сфармаваць аладкі і пакласці ў сярэдзіну начынку з лёгкага і сэрца. Сфармаваць даўгаватыя піражкі і абсмажыць іх на сумесі масла і алею. Давесці да гатоўнасці ў духоўцы.
Нарэзаць капусту, дадаць цёртую моркву, соль, цукар, воцат і раслінны алей. Змяшаць. Выкласці салату з капусты на талерку, побач – гатовыя картафлянікі. Падаць са смятанай.
Ялавічнае лёгкае ў паніроўцы, пюрэ з кораня салеры і вінны соус з чарнаслівам
- ялавічнае лёгкае – 1 шт.
- корань салеры – 2 шт.
- часнык – 50 г
- вяршкі 33% – 300 мл
- пармезан – 100 г
- масла сметанковае – 80 г
- паніровачныя сухары – 150 г
- яйка – 3 шт.
Для адварвання лёгкага
- цыбуля – 50 г
- морква – 50 г
- корань салеры – 50 г
- лаўровы ліст
- соль
- перац чорны гарошак
Соус
- віно чырвонае – 100 мл
- чарнасліў – 80 г
- кукурузны крухмал – 30 г
- палачка карыцы – 2 шт.
- апельсін – 1 ш. (каля 200 г)
- соль
- цукар
Варанае лёгкае наразаем на кавалачкі, абвальваем па чарзе ў муцэ, яйку, сухарах і абсмажваем на патэльні з разагрэтым сметанковым маслам.
Салеру чысцім ад скуркі ды запякаем у сумесі чабору, солі, перцу і аліўкавага алею пры тэмпературы 180 градусаў цягам ад 40 хвілін да 1 гадзіны (пакуль не стане мяккаю). Гатовы корань кладзем у сатэйнік з топленым сметанковым маслам, падаграваем, дадаем вяршкі і даводзім да кіпення, затым усыпаем цёрты пармезан. Атрыманае змешваем блендэрам і праціраем праз сіта.
Робім соус. Чарнасліў і віно разаграваем у сатэйніку, дадаем цукар, палачку карыцы, праварваем і дадаем крухмал, каб загусціць.
Чый варыянт перамог у кулінарнай бітве? Глядзіце у новым выданні кулінарнага шоу «Я не буду гэтага есці!» (відэа ў пачатку артыкула).
Шоу «Я не буду гэтага есці!» глядзіце штонядзелю а 19:35 паводле менскага часу на тэлеканале «Белсат» праз спадарожнік «Astra 4A» (ранейшая назва «Sirius 4»), онлайн, на YouTube-канале «Белсат Life» або ў архіве на нашай старонцы.
Любіце гатаваць? Сачыце за абнаўленнямі на Facebook, у «Одноклассниках» і ў Instagram.
ІА, belsat.eu
