Сюжэт пра Вольгу Александэр, якая сваймі араматамі аблягчае пакуты цяжка хворых дзяцей і натхняе музыкаў, зняла праграма «Беларускі свет».
Парфумерка Вольга Александэр жыве ў Бруселі, выкладае ў Вышэйшай школе парфумерыі ў Парыжы ды кіруе навукова-даследчай лабараторыяй у Люксембургу.
«Я прадстаўніца вельмі рэдкай і вельмі цікавай прафесіі – я займаюся альфакторнаю тэрапіяй, або лячэннем водарамі», – распавядае яна пра сябе.
Вольга – ініцыятарка ды асноўная рэалізатарка дабрачыннага праекту «Парфума анёла», у межах якога ствараюцца пахі, здольныя аблегчыць пакуты невылечна хворых дзяцей у Беларусі.
Падчас здымкаў сюжэту для «Беларускага свету» мы паразмаўлялі і са студэнтамі Вольгі, якія акурат атрымалі заданне стварыць кампазіцыю «encrage» – альфакторны стымулятар, які мае дапамагчы чалавеку стаць больш упэўненым у будучыні.
У 2012 годзе Вольга разам з мужам стварылі ў Бруселі краму рэдкай парфумы «Parfum d’Ambre». Гэтая крама – месца, дзе ладзяцца майстар-класы па стварэнні парфумы, а таксама выставы фатаграфіі ды выяўленчага мастацтва.
Тры-чатыры разы на год адбываюцца альфакторныя канцэрты, якія спалучаюць музыку і парфуму: музыкі натхняюцца водарамі і падбіраюць да іх музычныя кампазіцыі ці імправізуюць.
Як выглядае працоўнае месца Вольгі ды якія пахі дапамагаюць тым, хто апынуўся ў госпісе, глядзіце ў праграме «Беларускі свет» (відэа ў пачатку артыкулу).
Праграма «Беларускі свет» выходзіць на «Белсаце» па аўторках а 19:05. Глядзіце праз спадарожнік «Астра 4A» (ранейшая назва «Sirius 4»), онлайн і ў архіве на нашай старонцы.
АВ, belsat.eu