Адпачынак у беларускім санаторыі каштуе, як паездка на Шры-Ланку

Беларускі спявак Дзядзя Ваня аддае перавагу актыўнаму адпачынку: летам два-тры тыдні серфінгу на Гоа і Шры Ланцы, узімку – сноўборд. Прызнаецца, што пакуль вялікай нагоды паляпшаць стан здароў’я не было. А вось ягоныя бацькі ездзяць лячыцца часта і вельмі задаволеныя адпачынкам у Беларусі.

Мы пастанавілі зрабіць эксперымент: ці ёсць яшчэ месцы ў айчынных санаторыях, дзе спявак з жонкаю і сямігадоваю дачкою маглі б улетку правесці два тыдні.

У санаторыі «Беларусачка» ёсць выбар: або двухмясцовы з дадатковаю раскладанкаю для дзіцяці, або двухпакаёвы люкс – 336 рублёў за содні ці $ 2,5 тыс. за 2 тыдні. Удзельнік нашага эксперыменту кажа, што за гэтыя грошы можна злятаць на Шры-Ланку.

У санаторыі «Зялёны бор», напрыклад, таксама засталіся апошнія прапановы, але кошты там удвая ніжэйшыя. Агулам кошты на пуцёўкі пачынаюцца ад 25 рублёў за содні. Прычым паўсюль каштарыс нам спачатку называлі ў расейскіх рублях, аўтаматычна прымаючы за расейцаў.

Усіх вабіць добрая медычная база нашых санаторыяў, якой ня могуць пахваліцца суседнія краіны. Шмат хто звяртае ўвагу на кошты: маўляў, іх не адрозніш ад курортных. Аднак адмыслоўца адзначае, што параўноўваць гэтыя адпачынкі нельга. У кошт пуцёўкі звычайна ўлучаныя ад пяці да сямі відаў працэдураў і харчаванне – на замову або шведскі стол. У траўні бальшыню пуцёвак звычайна ўжо прададзена. Аднак нават калі ў самім санаторыі пуцёвак няма, іх яшчэ можна знайсці ў турыстычных фірмах, што рэзервуюць пад сябе пэўную колькасць.

Аздараўляльны комплекс «Іслач-Парк» побач з Ракавам пабудавалі на тэрыторыі былога Дому пісьменнікаў. Гэта прыклад сучасных рэкрэацыйных цэнтраў, куды едуць ня лекавацца, а для аздараўлення і камфортнага адпачынку ў цішыні. Кошт за асобу тут складае восемдзесят рублёў на содні, за дзве асобы – сто дваццаць, са сняданкам і наведваннем водна-тэрмальнае зоны. Спа-працэдуры ды вячэра – за дадатковую плату. У сезон, асабліва на выходныя, людзей тут вельмі шмат. Але пакуль на лета месцы яшчэ ёсць.

Глядзіце іншыя сюжэты праграмы «Асабісты капітал»:

Больш матэрыялаў

Грошы скончыліся. Як выжыць без іх?

«Каму гэтая інфармацыя што дасць?» Як ад беларусаў хаваюць сапраўдны маштаб эпідэміі

Грошы на чужой бядзе. Хто нажываецца на эпідэміі?

Новая нармальнасць. Якой будзе Беларусь пасля пандэміі?

Каронакрызіс. Параўналі дзяржаўную дапамогу ў Беларусі ды іншых краінах

Медыцына не для ўсіх. Дзе і хто лечыць чыноўнікаў?

Крызіс на парозе. Як уратаваць свае ашчаджэнні?

Не грэчкай адзінай. Чым трэба закупіцца на выпадак каранціну?