Прэзідэнт ЗША Доналд Трамп вырашыў працягнуць яшчэ на год санкцыі супраць некаторых беларускіх грамадзянаў і чыноўнікаў. Захады пераглядзяць у чэрвені 2019 года.
Згодна з указам, санкцыі скіраваныя супраць асобаў, якія «здзяйсняюць парушэнні правоў чалавека, звязаныя з палітычнымі рэпрэсіямі, уключаючы затрыманні і знікненні; удзельнічаюць у грамадскай карупцыі, у тым ліку шляхам адцягнення або няправільнага выкарыстання беларускіх дзяржаўных актываў або няправільнага выкарыстання дзяржаўнае улады».
«Дзеянні і палітыка пэўных членаў урада Беларусі і іншых асобаў працягваюць ствараць неардынарную і выключную пагрозу для нацыянальнай бяспекі і вонкавае палітыкі ЗША», – гаворыцца ў заяве Белага дому.
На сёння ў санкцыйным спісе дзесяць чалавек: Аляксандр Лукашэнка, Віктар Лукашэнка, Лідзія Ярмошына, Віктар Галаванаў, Віктар Шэйман, Дзмітрый Паўлічэнка, Сцяпан Сухарэнка, Аляксандр Зімоўскі, Уладзімір Навумаў і Наталля Пяткевіч.
Яны не могуць мець уласнасці і права на ўласнасць, адкрываць банкаўскія рахункі і праводзіць фінансавыя аперацыі на тэрыторыі ЗША.
Санкцыі ў дачыненні да Аляксандра Лукашэнкі і шэрагу чыноўнікаў і членаў іх сем’яў пасля прэзідэнцкіх выбараў 2006 года ўвёў тагачасны прэзідэнт ЗША Джордж Буш. Пасля гэтага лідары ЗША штогод пераглядалі і працягвалі іх.
ДД
