Стасункі паміж ЗША і Іранам зноў абвастрыліся: прэзідэнт Доналд Трамп заявіў аб увядзенні новых антыіранскіх санкцыяў, а Тэгеран папярэдзіў аб жорсткім адказе на любыя агрэсіўныя дзеянні з боку Вашынгтона. Пра гэта паведамляе golos-ameriki.ru.
Трамп у гутарцы з журналістамі заявіў аб увядзенні «дадатковых санкцыяў», каб перашкодзіць Ірану распрацаваць ядраваю зброю. Што за санкцыі будуць уведзены – пакуль невядома. Прэзідэнт таксама не выключыў ваенных дзеянняў, паўтарыўшы, што ЗША «не дазволяць Ірану завалодаць ядравай зброяй». Ён дадаў, што, калі іранскія лідары адмовяцца ад ядравых амбіцыяў, іх краіна будзе багатай, а прэзідэнт ЗША стане «іх лепшым сябрам».
У сваю чаргу афіцыйны прадстаўнік МЗС Ірана Абас Мусаві ў інтэрв’ю журналістам заявіў, што Тэгеран не дазволіць нікому парушаць яго мяжы.
«Іран будзе жорстка супрацьстаяць любой агрэсіі або пагрозе з боку Амерыкі», – сказаў Мусаві.
Міністр замежных справаў Ірана Джавад Зарыф апублікаваў у суботу ў Тўітэры карты, на якіх, паводле ягоных словаў, відаць, што іранскія вайскоўцы знішчылі амерыканскі беспілотнік, калі ён здзяйсняў палёт над тэрытарыяльнымі водамі Ісламскай Рэспублікі. Нагадаем, ЗША сцвярджаюць, што беспілотнік збілі ў міжнароднай паветранай прасторы.
- 15 ліпеня 2015 года Іран і шэсць сусветных дзяржаваў (ЗША, Францыя, Вялікая Брытанія, Германія, Кітай і Расея) дасягнулі пагаднення па іранскай ядравай праграме. Тады Тэгеран пагадзіўся часткова згарнуць праграму ўзамен на адмену санкцыяў. Аднак у 2018 годзе прэзідэнт ЗША Доналд Трамп выйшаў з гэтай здзелкі, палічыўшы яе аднабаковай, і аднавіў санкцыі.
- Апошнім часам напружанасць у стасунках паміж Іранам і ЗША толькі ўзмацнілася . У траўні адміністрацыя Трампа накіравала на Блізкі Усход ударную групу авіяносца «Абрагам Лінкальн» і бамбавікі, каб прадэманстраваць Ірану гатоўнасць ЗША да рашучых крокаў. ЗША скасавалі дзеянні выключэнняў, якія дазвалялі шэрагу краінаў свету купляць іранскую нафту і пры гэтым не парушаць амерыканскіх санкцыяў, і ўнеслі Корпус вартавых ісламскай рэвалюцыі ў спіс тэрарыстычных арганізацыяў. Таксама Трамп увёў санкцыі ў дачыненні да экспарту іранскіх металаў (сталі, алюмінію, медзі і жалеза) і найбуйнейшага ў краіне нафтахімічнага холдынгу.
- 20 чэрвеня Корпус вартавых ісламскай рэвалюцыі абвясціў, што збіў амерыканскі дрон. Газета «The New York Times» пісала, што ў ноч на 21 чэрвеня Трамп ухваліў ваенныя ўдары па Ірану ў адказ на атаку на беспілотнік, аднак у апошні момант адмяніў рашэнне.
ІІ belsat.eu
