Жыхара Маладзечна тры разы аштрафавалі за парушэнне правілаў самаізаляцыі. Яго сумарны штраф складае 105 базавых велічыняў, паведамляе kraj.by.
Як распавяла kraj.by афіцыйны прадстаўнік Маладзечанскага РАУС Юлія Крук, у ліку асобаў, якім працаўнікі Маладзечанскага занальнага цэнтру гігіены і эпідэміялогіі афіцыйна вынеслі патрабаванне аб выкананні рэжыму самаізаляцыі, аказаўся 44-гадовы жыхар Маладзечна. Ён быў абавязаны пастаянна знаходзіцца па месцы жыхарства. Пакідаць дом яму дазвалялася толькі ў выключных выпадках: для паходу ў бліжэйшую краму, аптэку або выкінуць смецце. Аднак мужчына праігнараваў гэтае патрабаванне.
«У красавіку маладзечанец выйшаў з хаты на вуліцу, каб пагутарыць з сябрамі, папаліць. У дачыненні яго быў складзены пратакол. Суд прызначыў яму пакаранне ў выглядзе штрафу ў памеры 30 базавых велічыняў. Праз дзень ён зноў парушыў правілы самаізаляцыі і выйшаў на вуліцу, каб пасядзець на лавачцы з сябрамі. Суд пастанавіў аштрафаваць мужчыну на 35 базавых велічыняў», – паведаміла Юлія Крук.
У пачатку траўня падчас праверкі міліцыянты высветлілі, што гэты мужчына зноў пакінуў месца жыхарства. Суд аштрафаваў яго яшчэ на 40 б.в. Сумарны штраф склаў 105 базавых велічыняў – 2 677,5 рублёў.
Раней 44-гадовы жыхар Маладзечна неаднаразова прыцягваўся да адміністратыўнай адказнасці за распіццё алкагольных напояў у грамадскім месцы (артыкул 17.3 КаАП РБ). Ён таксама знаходзіцца на ўліку сямейных скандалістаў.
Акрамя гэтага факта ў раёне «больш не выяўлена выпадкаў парушэння правілаў самаізаляцыі», кажуць у міліцыі.
- Савет міністраў Беларусі прыняў 8 красавіка пастанову аб умовах самаізаляцыі для інфікаваных COVID-19, а таксама кантактаў першага і другога ўзроўню. Грамадзяне, якія знаходзяцца ў самаізаляцыі, абавязаны не пакідаць месца пражывання за выключэннем выпадкаў крайняй неабходнасці (наведванне бліжэйшай харчовай крамы або аптэкі, а таксама вынас смецця). За парушэнне гэтых правілаў чалавек можа быць прыцягнуты да адміністратыўнай адказнасці. Таксама грамадзяніна могуць прыцягнуць і да крымінальнай адказнасці, калі ягоныя дзеянні пацягнуць за сабою заражэнне іншых людзей з цяжкімі наступствамі.
ІІ belsat.eu
