Цвярскі раённы суд Масквы прысудзіў актору Паўлу Усцінаву, затрыманаму на акцыі 3 жніўня, тры з паловай гады пазбаўлення волі. Пра гэта паведамляе «Дождь».
Асуджаны прызнаны вінаватым у гвалце ў дачыненні да супрацоўніка Расгвардыі. Пракурор прасіў для яго шэсць гадоў калоніі.
Актора затрымалі 3 жніўня на Пушкінскай плошчы падчас няўзгодненай акцыі пратэсту за свабодныя выбары. Пацярпелым выступае гвардзеец Аляксандр Лягін, якому, паводле следства, Усцінаў пры затрыманні вывіхнуў плячо.
24-гадовы асуджаны не прызнаў віну і заявіў, што проста стаяў у баку і чакаў сябра, у акцыі не ўдзельнічаў. «Мяне заламалі, пачалі біць адмысловымі сродкамі, я не супраціўляўся ні разу», – распавядаў ён.
На відэа затрымання бачна, як працаўнікі Расгвардыі павалілі актора на зямлю і пачалі збіваць яго дубінкамі.
МГ belsat.eu
