У Магілёве затрымалі каардынатара ініцыятыўнай групы Віктара Бабарыкі па Магілёўскай вобласці Уладзіміра Дударава.
У прэс-службе Віктара Бабарыкі belsat.eu паведамілі, што інфармацыя пра затрыманне Дударава паступіла ўвечары 11 чэрвеня. Прычыны затрымання невядомыя. З дапамогай ініцыятыўнай групы каардынатару ўжо знайшлі адваката.
Таксама раніцай 12 чэрвеня стала вядома пра затрыманне яшчэ аднаго сябра ініцыятыўнай групы з Магілёву – кіраўніка мясцовага філіялу «Белгазпрамбанку» Сяргея Кармызава.
У прэс-службе заклікалі тых сябраў ініцыятыўнай групы, у якіх узнікаюць праблемы з праваахоўнікамі, звяртацца ў штаб, які будзе аказваць ім неабходную дапамогу.
Уладзімір Дудараў у 2018 годзе быў прызначаны намеснікам старшыні Магілёўскага гарвыканкаму, курыраваў пытанні будаўніцтва і жыллёва-камунальнай гаспадаркі. Сваю пасаду ён пакінуў у кастрычніку 2019 года.
11 чэрвеня ў галоўным офісе «Белгазпрамбанку», а таксама ў кампаніях «ПрыватЛізінг», «Кампары» і «Кентаўр» прайшлі ператрусы.
Патэнцыйны кандыдат у прэзідэнты Віктар Бабарыка 20 гадоў узначальваў гэты банк.
Таксама 11 чэрвеня «Белгазпрамбанк» заблакаваў магчымасць пераводу грошай асобным кампаніям, у прыватнасці краўдфандынгаваму сэрвісу MolaMola. Адзін з заснавальнікаў MolaMola – Эдуард Бабарыка, сын і кіраўнік штаба Віктара Бабарыкі.
МГ belsat.eu