Не спаць некалькі содняў, каб быць першым? Лёгка! У Менску адчынілі краму «H&M». «Закупы» у Беластоку – усё? ?Як гэта было ??https://naviny.belsat.eu/news/zanyali-chargu-za-sodni-shto-adbyvaetstsa-na-adkrytstsi-kramy-h-m-u-mensku/
Opublikowany przez Белсат TV Sobota, 28 września 2019
Крама раздавала сертыфікаты, торбы з нататнікамі, вадой і печывам, а таксама забаўляла наведвальнікаў танцамі ад прадаўцоў.
Крама вядомага шведскага брэнду «H&M» адчынілася ў Менску сёння, 28 верасня. За два дні да гэтага брэнд зладзіў VIP-вечарыну для розных вядомых людзей, блогераў, журналістаў. А праз два дні крама адчынілася для ўсіх астатніх.
Што праўда, не абышлося без ажыятажу. Бо напярэдадні ў сацыяльных сетках «H&M» распаўсюдзіў інфармацыю, што першыя тры наведвальнікі атрымаюць грашовыя сертыфікаты на 300, 250 і 200 рублёў, а першыя тысяча наведвальнікаў – сертыфікаты па 30 рублёў.
Яшчэ за содні да адкрыцця крамы гандлёвы цэнтр «Galleria Minsk» зрабіў здымак трох маладых людзей, якія прыйшлі першымі і занялі чаргу. Яны, дарэчы, і сталі потым уладальнікамі трох буйных сертыфікатаў.
Адміністрацыя ГЦ пра хлопцаў паклапацілася: дазволіла ім застацца на ноч у холе, пакінула ацяпленне, а крама прыносіла ежу, ваду і пледы. Таксама ўсю ноч працавала прыбіральня і крама «Еўраопт». Карацей, амаль камфортныя ўмовы – толькі б не заснуць у чарзе.
Хлопцы, дарэчы, былі не адзіныя, хто заночыў каля крамы. Насця, Стас і Дзіма прыйшлі а 19:00 у пятніцу і хацелі быць першымі. Але не сталі.
Як распавялі маладзёны Belsat.eu, яны ўсю ноч забаўляліся тым, што будавалі з бутэлек ад вады домікі. Нават думалі сысці раніцай дамоў, бо маглі атрымаць толькі сертыфікаты на 30 рублёў. Але з-за прагі да прыгодаў засталіся. Дарэчы, пасля адкрыцця крамы яны паехалі ва ўніверсітэт на пары.
Перад адкрыццём для ўсіх прысутных выступіла спявачка Зена. Пад ейныя песні танчылі як будучыя наведвальнікі, гэтак і супрацоўнікі крамы.
Сярэдні ўзрост тых, хто стаяў у чарзе, быў прыкладна 16-21 год. Але былі там і тыя, каму за 40, і пенсіянеры!
– Прыйшла паглядзець, пацікавіцца, што тут і да чаго. Можа, потым і надалей буду гэтую краму наведваць. Мы ж пенсіянеры, нам трэба што танней, – кажа спадарыня Вера. Кошты яна не ведае, але анансаваныя 40 рублёў за швэдар ёй падаюцца «непасільнымі». Пра сетку «H&M» Вера з мужам не чулі, а пра адкрыццё крамы даведаліся праз сарафаннае радыё.
Яшчэ адна жанчына, Вольга, кажа, што прыйшла на адкрыццё дзеля сертыфікату. У чарзе яна стаіць з дачкой, таму «аб’яднаўшы намаганні, штосьці мо і купім».
Некаторыя мінакі, якія праходзілі ўздоўж чаргі, што стаяла на вуліцы, казалі: «Субота! Не бы паспаць».
Перад самым адкрыццём крамы ў чарзе стаяла ўжо больш за 2 тысячы чалавек. Падлічыць гэта было проста: крама раздавала кожнаму наведвальніку торбы з фірмовым нататнікам, вадой і печывам. І торбаў такіх было раздадзена 2 тысячы! За прыкладна гадзіну да адкрыцця чарга ўжо добра высунулася на вуліцу.
– Я прыйшла ў «Pandora», але думаю: дай і ў гэтую краму зайду. Хвілін 10 у чарзе гатовая пастаяць. Пра сертыфікаты я не чула, – кажа жанчына, якая стала ў канец чаргі за 20 хвілінаў да адкрыцця.
Пенсіянерка Ларыса, якая таксама стаіць у чарзе ў «H&M», сказала, што часта бывае ў Швецыі і вельмі любіць гэтую марку. Паводле яе, кошты тут, хутчэй за ўсё, прыстойныя, «як у Польшчы дакладна».
– Буду ў менскую краму хадзіць – асабліва за дзіцячай вопраткай, – кажа Ларыса.
Максім, які заняў першым чаргу і атрымаў сертыфікат на 300 рублёў, прыйшоў у краму ў куртцы ад «H&M».
– Набыў яе ўчора, у сэкандзе, – распавёў Максім Belsat.eu. – Сёння я нічога не набыў. Усе грошы пойдуць на рэчы для дзяцёнка – у мяне ёсць дачка, якой 7 год. Яна мне маральна дапамагла адстаяць гэтую чаргу.
Максім прыйшоў абсалютна выпадкова. З працы (хлопец працуе ў гандлёвым цэнтры ахоўнікам) хацеў заехаць на дабрачынную барахолку ў «Калі ласку», але вырашыў зазірнуць у «Галерэю».
– Я думаў, што чарга ёсць. Таму і не рыхтаваўся, не ўзяў з сабой анічога, нават зарадкі для тэлефона. У мяне быў выбар: сыходзіць ці заставацца і быць першым. Я абраў быць першым, – кажа малады чалавек.
Максім не спаў двое содняў і таму ноч памятае ўрыўкамі. Яго выпускалі падыхаць паветрам, папаліць, далі пледы.
Пасля таго, як атрымаў сертыфікат, Максім пайшоў дамоў спаць.
Другое месца і сертыфікат на 250 рублёў атрымаў Арцём. Ён кажа, што фанат «H&M». Прыйшоў днём у пятніцу ў ГЦ, пазнаёміўся з Максімам і вырашыў да яго далучыцца.
Тыя, хто стаяў у чарзе, маглі пакінуць яе на 20 хвілінаў – каб схадзіць у прыбіральню, па ежу ці каву. Для гэтага ахоўнікі раздавалі спецыяльныя карткі. Агулам тыя, хто паўдзельнічаў у акцыі, кажуць, што ўсё было арганізавана на ўзроўні – не было даўкі, людзі абсалютна спакойна стаялі, а потым гэтак жа спакойна заходзілі па чарзе ў краму.
Першая тысяча чалавек атрымала карткі-сертыфікаты на 30 рублёў тэрмінам на 3 гады. То бок сёння яны маглі зрабіць пакупку на 12 рублёў, і яшчэ 18 рублёў застануцца на картцы.
Таксама крама распачынае дабрачынны праект: кожны дзень можна прыносіць старыя рэчы, пакідаць іх у краме і атрымліваць за гэта зніжку 15 %.
Ксенія Тарасевіч, фота Ірына Арахоўская Belsat.eu