Барысаўскі раённы аддзел Следчага камітэту распачаў крымінальную справу ў дачыненні да загадчыцы адной з мэблевых крамаў райцэнтра. 36-гадовая жанчына падазраецца ў тым, што прысабечыла грашовыя сродкі крамы на агульную суму каля 350 тысячаў рублёў.
Паводле следства, падазраваная рэалізоўвала пакупнікам мэблю але аперацыі не праводзіла па касавым апараце, а афармляла фіктыўныя дамовы куплі-продажу. Атрыманыя грошы прысабечвала і выдаткоўвала на асабістыя патрэбы. Такім чынам жанчына з верасня 2014 па снежань 2018 году атрымала 350 тысячаў рублёў, ці амаль 175 тысячаў долараў ЗША
Дзеянні падазраванай кваліфікаваныя па ч. 4 арт. 211 (прысабечванне маёмасці асобай, якой яно даверана, учыненае ў асабліва буйным памеры) Крымінальнага кодэксу Рэспублікі Беларусь. Да яе ўжытая мера працэсуальнага прымусу – абавязацельства аб яўцы.
У межах расследавання праводзяцца допыты, вывучаецца канфіскаваная дакументацыя, якая тычыцца дзейнасці крамы.
Канчатковая прававая ацэнка дзеянням падазраванай будзе дадзена па выніках расследавання.
СК, belsat.eu