З гандлёвага цэнтру «Галілеа» у цэнтры Менску і размешчанага з ім у адным будынку аўтавакзалу «Цэнтральны» удзень 31 сакавіка эвакуявалі наведвальнікаў і персанал. Пра гэта belsat.eu паведамляюць відавочцы.
Уваходы ачапілі супрацоўнікі міліцыі, на пад’ездах стаяць машыны ДАІ і Міністэрства па надзвычайных сітуацыях.
Таксама эвакуяваны і Чыгуначны вакзал. У ачапленні заўважаныя вайскоўцы.
Паведамляецца і пра эвакуацыю гандлёвага цэнтру «Замак» на праспекце Пераможцаў.
Прэс-сакратарка Менскага гарадскога ўпраўлення МНС Вольга Мельчанка ў каментары belsat.eu паведаміла, што супрацоўнікі ведамства выехалі ў падтрымку ГУУС. Дакладныя прычыны эвакуацыі ёй невядомыя.
Па словах жаўнераў унутраных войскаў, якія стаяць у ачапленні, гандлёвыя цэнтры і вакзалы зачыненыя «па тэхнічных прычынах», паведамляе карэспандэнтка belsat.eu з месца падзеі.
Як праінфармавалі ў Следчым камітэце, 31 сакавіка паступіла паведамленне аб небяспецы ў гандлёвых цэнтрах «Галілеа», «Замак» і на чыгуначным вакзале. «У мэтах забеспячэння бяспекі праведзена эвакуацыя грамадзян. Абставіны здарэння высвятляюцца», – заявілі ў СК.
У ГУУС Менгарвыканкаму дадалі, што паведамленне пра замініраваныя «Галілеа», «Замак» і чыгуначны вакзал паступіла а 13:00. На месцах працуюць сапёрна-піратэхнічныя групы.
А 15:48 у «Галілеа» пачалі запускаць супрацоўнікаў.
Па стане на 17:00 паводле Менску ГЦ «Галілеа», «Замак» і менскі чыгуначны вакзал працуюць у нармальным рэжыме. А 16:00 сапёрная група скончыла працу. Паведамленне аб небяспецы не падцвердзілася.
Таксама, як паведамляе DELFI.ee, эвакуацыя сёння праходзіць і ў гандлёвых цэнтрах Эстоніі, дзе таксама была пагроза тэракту. Апроч таго, выбухоўку шукаюць у гатэлі «Украіна» у Кіеве. Наколькі гэта звязана з менскімі падзеямі, мы сказаць дакладна не можам.
МГ belsat.eu
