Кароткаметражны фільм «Возера радасці» створаны паводле аднайменнага раману Віктара Марціновіча, які стаў бэстсэлерам у 2018 годзе. Сусветная прэм’ера адбудзецца на міжнародным кінафестывалі ў Клермон-Феране ў лютым – карціну адабралі ў асноўную праграму, піша TUT.BY
Фільм «Возера радасці» – гэта экранізацыя частцы кнігі Марціновіча, дзе распавядаецца пра дзевяцігадовую Ясю, жыццё якой кардынальна змянілася пасля смерці маці. Пасля таго як бацька адвозіць Ясю ў інтэрнат, яна пачынае сама будаваць свае новае жыццё.
Здымкі адбываліся ў чатырох вёсках Ляхавіцкага раёну Берасцейскай вобласці. Галоўную ролю выканала выхаванка магілёўскага інтэрната Настасся Пляц. У карціне таксама задзейнічаны – Ігар Сігаў ( «Дзверы», «Франц + Паліна», «Унутры сябе»), Святлана Анікей ( «Хрусталь», «Ягор»), Аляксандр Малчанаў, Алена Зуй-Вайцяхоўская, Таццяна Мархель, Дзяніс Тарасенка і іншыя. Саундтрэкам да фільму абраная музыка беларускага этна-гурта «Vuraj».
Гульнявыя і дакументальныя фільмы рэжысёра Аляксея Палуяна прымалі ўдзел у міжнародных кінафестывалях. На 24-м Менскім МКФ яго фільм «Край Жанчыны» быў уганараваны прызам «За вернасць маральным ідэалам у кінамастацтве». У 2018 году рэжысёр прадставіў у рамках Нацыянальнага конкурсу юбілейнага «Лістапада» сваю новую працу – «Парушэнне спакою».
«Возера радасці» – вельмі асабісты для маёй сямʼі фільм, – распавядае рэжысёр Аляксей Палуян. – Я хацеў расказаць драму аб дзіцяці, якое ў 9 гадоў адважваецца будаваць свой шлях самастойна. Не кожны дарослы чалавек гатовы да гэтага выбару, а Яся змагла. Для мяне было празмерна важна, каб галоўную ролю выканала дзіця з інтэрнату. Мне пашчасціла сустрэць Насцю Пляц у магілёўскім інтэрнаце. Яна паверыла мне і прыадчыніла часцінку свайго вельмі глыбокага свету».
Паводле рэжысёра, гэта светлы фільм, таму што, гледзячы на дзяцей, мы, дарослыя, вучымся ў іх і атрымліваем сілы і энергію.
Міжнародны кінафестываль у Клермон-Феране лічыцца найважнейшым аглядам кароткага метра, ён праводзіцца з 1979 года. Гэта самы вялікі фестываль кароткаметражных фільмаў у свеце, другі па наведвальнасці ў Францыі пасля Канскага кінафоруму. У выпадку перамогі ў Клермон-Феране стужка аўтаматычна намінуецца на прэмію «Оскар».
Выхад фільма на экраны беларускіх кінатэатраў плануецца восенню гэтага года.
КА, belsat.eu
