Выхадзец з Беларусі і ўкраінец затрыманыя ў ЗША за парушэнне фінансавання выбараў
Выхадцаў з былога СССР, бізнесоўцаў Ігара Фрумана і Льва Парнаса, якіх у ЗША лічаць галоўнымі падазраванымі ў парушэнні заканадаўства аб фінансаванні выбараў, затрымалі амерыканскія праваахоўнікі. У судзе ім агучылі абвінавачанні. Пра гэта піша Бі-Бі-Сі.
Паводле пастановы суддзі прадпрымальнікі могуць быць адпушчаныя пад хатні арышт пасля выплаты залогу ў памеры 1 мільён долараў кожны і прадстаўленні паручыцельства пра тое, што яны не будуць спрабаваць пакінуць тэрыторыю ЗША. Скандал з удзелам бізнесоўцаў атрымаў мянушку «Украінагейт».
Як растлумачыў пракурор Джэфры Бэрман, падазраваныя незаконна ахвяравалі розным структурам, звязаным з Рэспубліканскай партыяй і выбарчым штабам Доналда Трампа 325 тысячаў долараў ЗША. Акрамя таго, па словах пракурора, яны спрабавалі аказаць палітычны ўплыў не толькі для прасоўвання сваіх уласных фінансавых інтарэсаў, але і для прасоўвання палітычных інтарэсаў украінскага чыноўніка, які дамагаўся адстаўкі амбасадара ЗША ва Украіне.
Хто такія ўкраінец Леў Парнас і беларус Ігар Фруман
Выхадзец з Украіны Леў Парнас пераехаў у Злучаныя Штаты разам з бацькамі ў 1976 годзе, калі яму было ўсяго чатыры гады. У пачатку 90-х ён паспрабаваў заняцца бізнесам, прадаючы бытавую электроніку і арганізуючы кантэйнерныя перавозкі тавараў з ЗША ў рэспублікі былога СССР, а затым працаваў брокерам у некалькіх кампаніях, якія займаліся аперацыямі з каштоўнымі паперамі.
Яго партнёр Ігар Фруман нарадзіўся ў Беларусі, пераехаў у ЗША яшчэ ў 80-я, але большую частку жыцця правёў ва Украіне, адкуль перабраўся ў Маямі. У 2005 годзе ён ажаніўся на ўраджэнцы Адэсы Лізавеце Навумавай, і разгарнуў у гэтым прыморскім горадзе прыкметную дзелавую актыўнасць.
СК belsat.eu
