Да першай гадавіны смерці Алеся Ліпая родныя, калегі і сябры ўсталююць помнік на яго магіле, у мястэчку Рудзенск, што за 40 кіламетраў ад Менску. Тут на могілках пахаваныя таксама ягоныя маці і сястра.
Сябры і аднадумцы Алеся Ліпая лічаць, што постаць Алеся і ўсе добрыя справы, якія ён пакінуў пасля сябе, вартыя памяці. І вартыя помніка.
Алесь Ліпай заўчасна памёр 23 жніўня 2018 года.
Журналіст, рэдактар і выдавец, патрыёт, паэт, пакінуў пасля сябе досыць багатую спадчыну.
Алесь Ліпай быў першым карэспандэнтам «Радыё Свабода» ў Беларусі. А ў 1991 годзе заснаваў першую незалежную інфармацыйную агенцыю Беларусі – БелаПАН.
Аўтар трох зборнікаў вершаў і тэкстаў да песень, якія дагэтуль выконваюць Зміцер Вайцюшкевіч і Ірына Відава.
Прадзюсар беларускага кіно, якое здымаў Андрэй Курэйчык.
Паводле яго ідэяў узнікла першая інтэрнэт-газета Беларусі Naviny.by, а БелаПАН стаў генеральным партнёрам свята «БНР – 100!» 25 сакавіка 2018 года.
Помнік стварае беларускі скульптар Вадзім Мацкевіч.
Сродкі для помніку збіраюцца пры дапамозе пляцоўкі ulej.by
СК belsat.eu
