Праз праблемы з вытворчасцю калійных угнаенняў і ў галіне нафтахіміі эканоміка Беларусі па выніках студзеня 2020 года не выканае прагнозныя паказнікі. Пра гэта піша TUT.by.
«Вынікі студзеня падводзіць яшчэ рана. Урад прагназуе ВУП на ўзроўні 98%. Падзенне звязана з нафтахіміяй і вытворчасцю калійных угнаенняў. Большасць галінаў ідзе ў прагнозе, а некаторыя, напрыклад сельская гаспадарка, – нават вышэй», – паведаміў прэм’ер-міністр Сяргей Румас.
Паводле Румаса, урад таксама станоўча ацэньвае трэнд на зніжэнне стаўкі рэфінансавання.
«Разам з тым мы чакалі большага кроку па яе зніжэння з улікам запаволення інфляцыі і тэндэнцыяў, якія адбываюцца ў суседніх краінах», – адзначыў прэмʼер. Банк Расеі апусціў ключавую стаўку на 0,25 працэнтных пункта – да 6% гадавых. Нацбанк Украіны знізіў уліковую стаўку з 13,5 да 11% гадавых.
Паводле слоў прэмʼер-міністра, зніжэнне стаўкі рэфінансавання ў большым памеры стымулявала б інвестыцыйную актыўнасць і паслала выразны сігнал рынку, што, нягледзячы на вонкавыя выклікі, сітуацыя ў эканоміцы стабільная. Акрамя таго, гэта дазволіла б зэканоміць бюджэтныя сродкі пры кампенсацыі працэнтных ставак банкам.
«Усталяванне стаўкі рэфінансавання – усё ж такі кампетэнцыя Нацыянальнага банка. Урад працягне дыялог на гэтую тэму з рэгулятарам», – сказаў на заканчэнне Румас.
ІІ belsat.eu
