Улады вырашылі падняць заробкі будаўнікам, каб тыя не з'язджалі на працу за мяжу

Мінбудархітэктуры падрыхтавала праект пастановы, паводле якой павышаюцца кошты чалавека-гадзіны рабочых-будаўнікоў чацвёртага разраду. Змены прапануецца ўвесці з 1 студзеня 2019 года.

Кошт аплаты адной гадзіны для рабочых-будаўнікоў 4-га разраду прапануецца з 1 студзеня наступнага году павялічыць да 8,15 рубля пры выкананні будаўніча-мантажных працаў, да 7,03 рубля – пры выкананні пусканаладачных працаў, паведамляе TUT.BY. Цяпер кошт чалавека-гадзіны працоўнага 4-га разраду складае ўсяго 6,04 рублі.

У Мінбудархітэктуры адзначаюць, што змены дазволяць павысіць аплату працы будаўнікоў на 30-35%, а таксама «выключыць фармаванне заробкаў паводле рэгіянальнай прыкмеце». Падобныя задачы на ​​рэспубліканскім семінары-нарадзе аб павышэнні эфектыўнасці будаўнічага комплексу паставіў кіраўнік Беларусі.

«Цягам апошніх гадоў назіраецца сурʼёзны адток спецыялістаў. За пяць гадоў галіна страціла больш за 50 тысячаў працаўнікоў, прычым, лепшых працаўнікоў. Яны зʼязджаюць на заробкі за мяжу. Чаму там няма нашых падрадчыкаў? »- спытаў кіраўнік краіны.

Колькі будаўнікоў зʼехала на заробкі

У Мінбудархітэктуры тлумачаць, што цягам 2015-2017 гадоў у галіне назіралася «звужэнне рынку будаўнічых паслугаў па ўсіх напрамках, і стварылася сітуацыя, якая прывяла да адтоку кваліфікаваных кадраў рабочых-будаўнікоў за межы Беларусі».

«Толькі цягам мінулага году з краіны зʼехалі амаль 9 тысячаў працоўных розных спецыяльнасцяў і амаль 50% ад гэтай колькасці – будаўнікі. Пры гэтым галоўная прычына адтоку кадраў – нізкі ўзровень заработнай платы высокакваліфікаваных рабочых-будаўнікоў, у параўнанні з заработнай платай працоўных аналагічных прафесіяў у Расейскай Федэрацыі і іншых суседніх краінах», – адзначае Мінбудархітэктуры.

Новыя расцэнкі, якія ведамства прапануе ўвесці з 1 студзеня 2019 года, дазволяць наблізіць заробкі беларускіх будаўнікоў да прыбыткаў іх расейскіх калегаў.

У Мінбудархітэктуры распавядаюць, што ў Беларусі ў будаўнікоў сапраўды нізкі ўзровень зарплаты ў параўнанні з суседнімі краінамі: у 1,3-2,4 разы ніжэй, чым у Расеі; у 1,8-3,3 разы ніжэй, чым у Польшчы; у 1,7-5,8 разы ніжэй, чым у Літве.

СК, belsat.eu