У выніку серыі выбухаў у Шры-Ланцы загінулі 290 асобаў

Ахвярамі серыі выбухаў у трох гарадах Шры-Ланкі сталі, паводле апошніх звестак паліцыі, 290 асобаў. Каля 500 – пацярпелі. Пра гэта паведамляюць улады ў Калёмба. Пакуль ніводная з груповак не ўзяла на сябе адказнасць за выбухі ў гатэлях і каталіцкіх касцёлах. Праваахоўныя органы затрымалі 13 падазраваных у датычнасці да злачынстваў.

У Шры-Ланцы пасля тэрарыстычнай атакі, як называюць яе ўлады, фактычна ўведзена надзвычайнае становішча: уведзена каменданцкая гадзіна, абмежаваны доступ да сацыяльных сетак, зачыненыя школы і ўніверсітэты, піша DW.COM. Між тым паліцыя збіраецца расследаваць паведамленні, што выведка краіны ведала пра падрыхтоўку да тэрактаў, але не зрабіла нічога для іх перадухілення. Два міністры ва ўрадзе Шры-Ланкі прама кажуць пра правал спецслужбаў, паведамляе агенцтва AP.

Выбухі ў трох пяцізоркавых гатэлях у Калёмба, а таксама ў трох каталіцкіх храмах прагрымелі ў нядзелю амаль адначасова. Пазней з’явілася інфармацыя пра сёмы і восьмы выбухі – адзін з іх быў учынены смяротнікам, калі паліцыя прыйшла да яго з ператрусам. Сярод загінулых – 32 замежнікі з больш чым 10 дзяржаваў, паведамілі мясцовыя турыстычныя арганізацыі. Сярод іх – грамадзяне ЗША, Вялікай Брытаніі, Партугаліі, Кітаю, Нідэрландаў, Бельгіі, Турцыі, Японіі, Індыі, Бангладэш і Пакістану.

Прэмʼер-міністр Шры-Ланкі ў сваім мікраблогу ў Twitter рэзка асудзіў «баязлівыя напады на народ» і заклікаў усіх грамадзянаў заставацца «згуртаванымі і моцнымі ў гэты трагічны час».

Каталікі складаюць толькі 6 % насельніцтва ў пераважна будысцкай Шры-Ланцы, аднак яны лічацца істотнай сілай у краіне, паколькі прадстаўнікамі каталіцкай царквы зʼяўляюцца і тамілы, і сінгалы.

Жорсткая грамадзянская вайна ў Шры-Ланцы, якая доўжылася 26 гадоў, скончылася ў 2009 годзе. Сепаратысты-тамілы змагаліся на стварэнне незалежнай дзяржавы на паўночнай частцы краіны. Армія жорсткімі метадамі атрымала перамогу ў гэтай вайне. ААН абвінавачвае абодва бакі ў здзяйсненні ваенных злачынстваў.

У выніку васьмі выбухаў у Шры-Ланцы загінула больш за 200 асобаў

СК belsat.eu

Hавiны