Сёлета ў Менску пройдзе міжнародны кангрэс Асацыяцыі ўдзельнікаў касмічных палётаў.
Форум пройдзе ў Менску з 9 па 15 верасня. Намеснік старшыні прэзідыума Акадэміі навук Сяргей Кілін паведаміў журналістам, што агулам у ім возьмуць удзел каля 90 касманаўтаў з 19 краінаў – Аўстрыі, Кітаю, Нідэрландаў, Нямеччыны, Швецыі і іншых дзяржаваў.
«Найвялікшыя дэлегацыі – з Расеі і ЗША», – паведаміў Кілін.
«Інтэрфакс» падае, што кангрэс наведаюць Святлана Савіцкая, першая жанчына, якая выйшла ў адкрыты космас, і былы рэкардсмен па знаходжанні ў адкрытым космасе Сяргей Крыкалёў.
«Будзе і такая легендарная асоба, як Віктар Савіных, які рэанімаваў станцыю «Салют-7», і амерыканец Скот Кэлі, які разам з Міхаілам Карніенкам на працягу года вывучаў, як рэагуе арганізм на працяглую адсутнасць гравітацыі», – дадаў Кілін.
У межах кангрэсу Менску адкрыюць помнік беларускім касманаўтам – Пятру Клімуку, Уладзіміру Кавалёнку і Алегу Навіцкаму, – а ў сталічным батанічным садзе з’явіцца Алея касманаўтаў.
На 12 верасня арганізатары форуму запланавалі «Community day», падчас якога касманаўты сустрэнуцца са студэнтамі менскіх вучэльняў.
ДД