Прэзідэнцкі палац акружылі вайскоўцы. Яны захапілі дзяржаўнае тэлебачанне і радыё. Цяпер у эфіры гучыць патрыятычная музыка. Пра гэта паведамляюць мясцовыя медыі і арабскі тэлеканал «Аль-Маядзін».
Мясцовы тэлеканал «Al-Hadath» паведамляе, што кіраўніка Судану арыштавалі. А тэлеканал «Sky News Arabia» паведаміў, спаслаўшыся на ўласныя крыніцы, што Амар аль-Башыр знаходзіцца пад хатнім арыштам.
Журналіст «Voice of America» Харун Маруф у сваім «Twitter’ы» паведаміў, што на вуліцах у Хартуме (сталіца Судану) з’явіліся вайскоўцы.
Цягам апошніх тыдняў у Судане адбыліся дэманстрацыі з патрабаваннем адстаўкі прэзідэнта. Пратэстоўцы звярталіся да арміі з просьбай зрынуць аль-Башыра з пасады. У аўторак у антыўрадавых пратэстах загінула 11 асобаў (6 сілавікоў).
Летась у снежні прэзідэнт Судану Амар аль-Башыр прылятаў з афіцыйным візітам у Менск.
Сёлета Служба бяспекі Украіны апрылюдніла спіс са 149 расейцаў з прыватнай вайсковай кампаніі «Вагнер», якія на пачатку 2019-га бралі ўдзел у задушэнні антыўрадавых дэмакратычных пратэстаў у Судане.
Прэс-сакратар расейскага МЗС Марыя Захарава зняпраўдзіла гэтую інфармацыю. Яна заявіла, што прыватныя расейскія інструктары займаюцца там падрыхтоўкай мясцовых сілавікоў.
У 2008 годзе Міжнародны крымінальны суд выдаў ордэр на арышт аль-Башыра па абвінавачванню ў этнічных чыстках падчас канфлікту ў Дарфуры (грамадзянская вайна на захадзе Судану, у якой загінулі больш за 300 000 чалавек). Амар Хасан аль-Башыр прыйшоў да ўлады ў 1989 годзе.
ЮВ belsat.eu
