Курдская адміністрацыя на поўначы Сірыі заклікала да стварэння міжнароднага трыбунала для суда над тысячамі баевікоў групоўкі «Ісламская дзяржава».
Сябра адміністрацыі Абдул Карым Амар паведаміў Бі-бі-сі, што неабходна прыняць рашэнне, што рабіць з тысячамі чальцоў «Ісламскай дзяржавы», якія апынуліся ў руках курдаў пасля ліквідацыі апошняй апоры джыхадзістаў у Багхузе на ўсходзе Сірыі.
На мінулым тыдні злучэння Сірыйскіх дэмакратычных сіл (СДС) пры падтрымцы курдаў занялі гэтую тэрыторыя. Сярод тысяч захопленых курдамі палонных ёсць каля тысячы замежнікаў, якія ваявалі ў шэрагах «ІД» – яны з’яўляюцца грамадзянамі каля 50 краінаў.
Агулам з пачатку гэтага года байцы СДС захапілі ў палон больш за 5 тысяч джыхадзістаў з Сірыі і іншых краінаў. Яны ўтрымліваюцца ў турмах і лагерах, а жанчыны і дзеці – у спецыяльна створаных цэнтрах.
- У 2017 годзе ў дакладзе амерыканскай аналітычнай кампаніі Soufan Group адзначалася, што расейцы складаюць самую вялікую групу замежнікаў, якія ваююць на баку тэрарыстычнай арганізацыі «Ісламская дзяржава» ў Іраку і Сірыі. Па падліках аўтараў дакладу, на баку «ІД» па стане на кастрычнік 2017 года ваююць 3417 грамадзянаў Расейскай Федерацыі. Другую па колькасці групу складаюць выхадцы з Саудаўскай Аравіі – 3244 чалавека. На трэцім месцы Іярданія з 3000 байцамі. Усяго, па падліках аўтараў дакладу, на баку «ІД» ваююць 8717 выхадцаў з краін былога СССР, уключаючы Расею. Расейскія ўлады раней прызнавалі, што сярод байцоў «Ісламскай дзяржавы» шмат расейцаў – ад 3,5 да 4 тыс.
- Грамадзяне Беларусі ў дакладзе амерыканскіх аналітыкаў не фігуравалі. Аднак у 2015 годзе кіраўнік МУС Беларусі Ігар Шуневіч заяўляў, што да «Ісламскай дзяржавы» далучыліся каля 10 беларусаў. У тым жа годзе СМІ паведамлялі пра тое, што ў Сірыі загінуў ураджэнец Гародні Дзяніс Васільеў, які ваяваў за ісламістаў.
ІІ belsat.eu