На гэтым тыдні ў Бранскай і Смаленскай вобласцях інспектары «Рассельгаснагляду» знішчылі некалькі партыяў яблыкаў агульнаю вагою больш за 140 тонаў, падае старонка службы.
У панядзелак і сераду інспектары знішчылі пяць партыяў яблык агульнаю вагою 80 тонаў, якія мытнікі затрымалі з дапамогай аўтаінспектараў і супрацоўнікаў ФСБ у Бранскай вобласці.
Падчас дагляду прадукцыі адмыслоўцы выявілі, што яблыкі ўехалі з тэрыторыі Беларусі ў абыход фітасанітарных кантрольных пастоў. Груз быў без неабходных суправаджальных дакументаў, якія пацвярджалі б паходжанне садавіны, яе якасць і бяспеку.
Яшчэ 61 тону яблык без дакументаў мытнікі затрымалі ў Смаленскай вобласці.
Ва ўсіх выпадках садавіну спачатку раздрабнілі, а потым закапалі.
Усяго ж з пачатку года мытнікі Смаленскай і Бранскай вобласцяў затрымалі больш за 3 400 000 кг прадукцыі, увезенай у Расею без дакументаў.
- 12 красавіка Расея забараніла ўвоз яблыкаў і груш з Беларусі. Масква абвінавачвае Менск у пастаўках санкцыйнай прадукцыі з Еўропы пад выглядам беларускай.
- У бліжэйшы час «Рассельгаснагляд» не мае намеру здымаць гэтую забарону.
ДД belsat.eu
