У Менску працаўнікі ДАІ затрымалі 63-гадовага грамадзяніна Літвы, які кіраваў аўтобусам у стане алкагольнага апʼянення. Пра гэта паведамляе прэс-служба ГУУС Менгарвыканкаму.
«13 жніўня прыблізна 20 гадзінаў 45 хвілінаў 63-гадовы кіроўца, кіруючы пасажырскім аўтобусам, які рухаўся па вул. Якубава ў напрамку вул. Ванеева, з’ехаў з праезнай часткі, выехаўшы на роварную дарожку, па якой працягнуў рух. Праехаўшы некаторую адлегласць, мужчына спыніў транспартны сродак і заснуў. Праз некаторы час на лінію 102 ГУУС Менгарвыканкама патэлефанавалі відавочцы і паведамілі пра здарэнне», – паведамілі ў міліцыі.
Праваахоўнікі, што выехалі на выклік, разбудзілі кіроўцу. Медычны агляд пацвердзіў стан алкагольнага апʼянення: канцэнтрацыя пароў алкаголю склала 1,49 праміле.
У ГУУС адзначылі, што кіроўца працуе ў літоўскай кампаніі, якая ажыццяўляе міжнародныя перавозкі пасажыраў, зʼяўляецца грамадзянінам Літвы. На мужчыну склалі тры пратакола аб адміністратыўных правапарушэннях.
ІІ belsat.eu
