За знявагу беларускай мовы прыцягнулі да адказнасці жыхарку Менску Вольгу Малкіну. Пра гэта паведаміў грамадскі актывіст Ігар Случак у Facebook.
Вольгу Малкіну прызналі вінаватай у парушэнні арт 9.22 КААП (парушэнне заканадаўства аб мовах). Пакаранне паводле гэтага артыкулу прадугледжвае штраф у памеры ад чатырох да дзесяці базавых велічыняў. Суддзя прысудзіў Вользе Малкінай 10 базавых велічыняў, або 270 рублёў.
Скандальная гісторыя адбылася ў 2019 годзе. Вольга Малкіна ў сваім Facebook напісала, што ведае «чатыры мовы, апроч мовы праграмавання»:
«Натуральна, у ****** беларуская мова не разглядалася для вывучэння. Наўмысна. Вучыце сваю б **** мову самі», – апублікавала Вольга Малкіна на сваёй старонцы.
Карыстальнік Fаcebook Глеб Сандрас накіраваў заяву ў міліцыю з просьбай прыцягнуць да адказнасці дзяўчыну за абразу беларускай мовы (арт. 9.22 КаАП – «Парушэнне заканадаўства аб мовах»). У адказе, які ён атрымаў, адзначаецца, што міліцыянты распачалі адміністрацыйную справу.
Раней стала вядома, што айцішніца Вольга Малкіна больш не працуе ў EPAM.
СК belsat.eu
