У Менску анансавалі акцыю з патрабаваннем вызваліць палітвязняў, але яна так і не адбылася
5 чэрвеня каля ГУМа ў Менску ініцыятыўная група Уладзіміра Няпомняшчых анансавала пікет. Актывісты распавялі, што будуць патрабаваць вызваліць Ціханоўскага і ўсіх палітвязняў.
Ініцыятыўная група Уладзіміра Няпомняшчых анансавала, што зладзіць пікет каля ГУМа ў Менску. Ініцыятары акцыі распавялі, што будуць патрабаваць вызваліць затрыманых актывістаў і палітыкаў. Сёння міліцыянты ў Гомлі затрымлівалі і самога Уладзіміра Няпомняшчых.
Журналісты «Белсату» паведамляюць, што каля ГУМа з 16.30 пачалі дзяжураць аўтазакі і сабраліся кіраўнікі сталічнай міліцыі. У пераходзе ля ГУМа пакуль прасторна.
Прыпынак каля ГУМа часова не працуе. Але пачынаюць збірацца людзі. Гэтак малады чалавек у кашулі з пагоняй распавядае, што прыйшоў сюды, каб аддаць свой подпіс за Святлану Ціханоўскую.
«Я абураны тым, што адбываецца ў нашай краіне, уласна такія затрыманні. Інфармацыю пабачыў у інтэрнэце пра пікет», – распавёў «Белсату» хлопец.
У сваю чаргу ініцыятыўная група Святланы Ціханоўскай паведамляе, што не мае дачынення да пікету.
Побач знаходзіцца пікет па зборы подпісаў за Валерыя Цапкалу.
Людзі пачалі пляскаць у далоні. Жанчына, што распачала кажа, што пляскала за сыход Лукашэнкі, яна перакананая, што яго час прайшоў, трэба даваць дарогу маладым.
«Тое, што ён пагражае свайму народу азербайджанскім сцэнарам – гэта не добрыя паводзіны для прэзідэнта», – сказала жанчына.
Telegram-канал «Еўрапейская Беларусь» паведамляе, што няма кантактаў з відэаблогерам Змітром Казловым, актывісты лічаць, што яго затрымалі. Затрымалі актывістку Алену Лазарчык.
У выніку анансаваная акцыя не адбылася. Міліцыянты раз’язджаюцца. Прыпынак адчынілі, цяпер аўтобусы спыняюцца. Але аўтазакі пакуль яшчэ знаходзяцца побач.
СК belsat.eu
