З 16 сакавіка ў Францыі зачыняць дзіцячыя сады, школы і ВНУ. У Чэхіі ўвялі надзвычайнае становішча, Бельгія намагаецца пазбегнуць «італьянскага сцэнара». Еўропа імкнецца спыніць распаўсюджванне каронавіруса.
Прэзідэнт Францыі Эмануэль Макрон назваў сітуацыю з распаўсюдам каронавірусу SARS-CoV-2 самым сур’ёзным крызісам у галіне нацыянальнай аховы здароўя за апошнія 100 гадоў, паведамляе DW.com.
«Мы толькі на пачатку гэтага крызісу. Нягледзячы на ўсе нашы намаганні спыніць вірус, ён працягвае распаўсюджвацца і набіраць тэмпы», – лічыць Эмануэль Макрон.
Прэзідэнт Францыі парэкамендаваў асобам, якія пакутуюць ад хранічных захворванняў і рэспіратарных праблемаў, а таксама інвалідам і старэйшым за 70 гадоў па магчымасці «заставацца дома». Ён дадаў, што апошнія, вядома, могуць выйсці ў крамы, падыхаць свежым паветрам, аднак павінныя максімальна абмежаваць свае кантакты.
У Бельгіі таксама зачыняюць школы, адмяняюць культурніцкія імпрэзы, прыпынілі працу кавярняў і рэстарацыяў. Новы рэжым распачнецца з суботы 14 сакавіка.
Урад Чэхіі ўвёў у краіне надзвычайнае становішча праз пагрозы распаўсюду каронавірусу. Рэжым увялі на 30 дзён, але ў выпадку неабходнасці яго могуць працягнуць.
Улады краіны фактычна зачынілі мяжу з Еўропай і Азіяй.
Паводле апошніх звестак, у свеце зафіксавана 128 343 выпадкаў заражэння на каронавірус. 4 720 інфікаваных памерлі, 68 324 вылечыліся.
У Беларусі афіцыйна паведамляецца, што ініфікаваныя на каронавірус 21 асоба.
13 сакавіка праз каронавірус надзвычайнае становішча таксама аб’явіла Іспанія.
CК belsat.eu