Што адбываецца ў войску за высокім плотам? Пра гэта шчыра распавядае былы кандыдат у дэпутаты Аляксей Лазараў, які цяпер праходзіць тэрміновую службу ў Лепельскім раёне.
Побыт у войску – не цукар
Паводле Аляксея, аб камфорце салдатаў аніхто не дбае. З кранаў у частцы цячэ вада ўсіх адценняў жоўтага, а на асабістую гігіену часам застаецца зусім мала часу.
– У цябе ёсць 30 секунд, каб памыць ногі, падпахі, пачысціць зубы і пасціраць шкарпэткі, – наракае Аляксей.
Часам, на водныя працэдуры жаўнерам даюць 5 хвілінаў – пры гэтым, на 10 чалавек усяго адна ракавіна.
– Нішто так не ўмацоўвае баявы дух, як адсутнасць дзвярэй у прыбіральнях. Менавіта там пачынаюцца самыя душэўныя размовы. Адразу ўспамінаецца «На Заходнім фронце без пераменаў», – распавядае Аляксей Лазараў у сваім блогу.
Ежа часта не самая смачная
Аляксей даволі часта каментуе ежу, якую даюць жаўнерам у войску. Ён наракае, што салдаты не ядуць цвёрдай ежы, іранізуе наконт мясцовых салатаў, і дзеліцца рэцэптам самай смачнай стравы за тэрмін ягонай службы. Фаварытам хлопца стала… тушонка з «Ролтанам»!
– Цікава, ці ёсць назва ў салаты, які складаецца з халоднага пюрэ і лука? – задаецца пытаннем Аляксей.
У беларускім войску часам пахне «русским духом»
Аляксей зазначае, што ў войску становяцца добра зразумелымі словы Лукашэнкі пра «фарпост Расеі». На першым тыдні службы ім чытала лекцыю аб веры, шкодзе Майдана і «гомасексуалізму» манашка. Ёсць і традыцыйныя лекцыі аб ідэалогіі ды вечаровы прагляд прагляд беларускіх афіцыйных навінаў. А вось расейскія навіны пасля тўіту Аляксея глядзець перасталі.
Свята могуць быць прыемнымі і ўтульнымі
Хоць у войску ў салдатаў вельмі мала ўласнага часу, часам здараюцца і неспадзяванкі. Аляксей у тўітах радуецца «цёпламу» святкаванню Новага года і Раства. Напрыклад, на Новы год жаўнерам нагатавалі шмат смачнай ежы, а на наступны дзень далі паспаць удзень.
Трэба насіць нязручную бялізну
Аляксей правёў падрабязны аналіз: што лепей – бялуга (звычайная вайсковая бялізна) ці тэрмабялізна. У шмат якіх салдатаў, у тым ліку і ў Аляксея, ад парашку, якім сціраюць «бялугу» пачынаецца алергія. Хуткі параўнальны аналіз паказаў – 6:0 на карысць тэрмабялізны.
Ёсць месца і забавам
Войска – гэта не толькі пра нарады, стрэльбу і выконванне загадаў афіцэраў. У Twitter Аляксей распавядае пра неблагія канцэрты, часам сучасную музыку ў сталоўцы і сумесныя наведванні лазні.
– Так прыемна ўпершыню за тыдзень адчуць сябе чыстым! – радуецца простым рэчам Аляксей.
Крытыкуеш – прапаноўвай
У Twitter Аляксей ня толькі фіксуе, што адбываецца ў ягонай частцы, але і дасылае свае прапановы. Ён зазначае, што можна дазволіць карыстацца смартфонамі, зрабіць больш частыя звальненні.
– Дарэчы, чаму б нашым мабільным аператарам не зрабіць які-небудзь тарыф «салдацкі»? Без інтэрнэту, але для званкоў і смс? Пры заробку ў 30 рублёў нам адносна нятанна абыходзіцца мабільная сувязь. Добры быў бы піяр-ход, – прапаноўвае Аляксей.
Хто такі Аляксей Лазараў?
Аляксей Лазараў стаў вядомы падчас леташняй выбарчай кампаніі да Палаты прадстаўнікоў. Ён быў сябрам кааліцыі «Моладзевы блок» – аб’яднання актывістаў, якія абаранялі інтарэсы моладзі. Лазараў быў актывістам кампаніі супраць «закону аб адтэрміноўках» #учебаважней.
Хлапец скончыў факультэт радыёфізікі і камп’ютарных тэхналогій БДУ, працаваў праграмістам у адной з кампаніяў-рэзідэнтаў ПВТ. Праз «закон аб адтэрміноўках» пасля сканчэння вучобы і выбарчай кампаніі ён адправіўся ў войска на паўгады. Аляксей служыць у вайсковай частцы ў вёсцы Заслонава Лепельскага раёну. У войску забаронена карыстацца смартфонамі, таму свой блог у Twitter ён вядзе праз СМС. А публікуе допісы адзін з ягоных сяброў.
Чытайце па тэме:
- У Менску на пікеце пагалілі кандыдата ў дэпутаты
- «Нашым гран-пры стане пачатак рэформаў у арміі». Інтэрв’ю актывіста руху #учёбаважнее
Ксенія Тарасевіч Belsat.eu
