Амбасадар Туркменістану ў Менску Назаргулы Шагулыеў забараніў туркменскім студэнткам, якія навучаюцца ў беларускіх ВНУ, насіць джынсавыя штаны і спадніцы, а хлопцам – бароды і наведваць мячэці.
Паводле словаў студэнтаў, сустрэча прайшла ў лютым. Увогуле такія сустрэчы адбываюцца рэгулярна, паведамляе Радыё Азатлык.
Пра вонкавы выгляд амбасадар заявіў у адказ на пытанне пра прычыны блакавання картак, выдадзеных Знешэканамбанкам Туркменістану, а таксама абмежавання магчымасцяў адпраўкі грошай з Туркменістану.
«Амбасадар пачаў патрабаваць, каб мы менш швэндаліся па клубах і рэстаранах. Забараніў дзяўчатам апранаць джынсавыя штаны, спадніцы ці падобную вопратку. Хлопцам студэнтам загадаў не насіць бараду. Сказаў, што хлопцы з бародамі падобныя да тэрарыстаў», – распавёў на ўмовах ананімнасці туркменскі студэнт.
Адносна картак Назаргулы Шагулыеў заявіў, што студэнты здымаюць грошы, мяняюць іх на долары і пасылаюць бацькам назад у Туркменістан, дзе яны мяняюць гэтыя долары на чорным рынку.
МГ belsat.eu
