Кіраўнік Беларусі 13 снежня падчас наведання Беларускага дзяржаўнага медычнага ўніверсітэту заявіў, што павінен кантраляваць рыхтаванне краіны да святкавання Новага года.
Адной з важных падзеяў Аляксандр Лукашэнка назваў Венскі баль у Палацы Незалежнасці, паведамілі ў прэс-службе кіраўніка краіны.
«Новы год – людзі будуць радавацца. Мая справа – узначаліць працу, каб настрой стварыць, правесці ў Палацы Незалежнасці Венскі баль. Туды яшчэ патрапіць трэба, бо жадаючых вельмі шмат. Я толькі маленькую долю змагу туды запрасіць», – адзначыў ён.
Лукашэнка расказаў, што аўстрыйскія партнёры прапаноўвалі яму правесці Венскі баль яшчэ тры гады таму. У першы раз ён вырашыў правесці свой баль, а зараз пагадзіўся.
Ён растлумачыў, што пляцоўка Нацыянальнага акадэмічнага тэатру імя Янкі Купалы, дзе першапачаткова планавалася правесці баль, паводле кіраўніка Беларусі, выявілася маленькай. Таму яго і перанеслі ў Палац Незалежнасці, заявіў ён.
«Венскі баль з А1 у Купалаўскім» анансаваўся на 14 снежня, але быў адменены. Арганізатары кажуць, што змяніўся фармат імпрэзы, бо яны прынялі запрашэнне Аляксандра Лукашэнкі стаць часткай прэзідэнцкага балю, які адбудзецца ў Палацы Незалежнасці 27 снежня. Тыя, хто збіраўся і рыхтаваўся да балю ў Купалаўскім, засталіся ні з чым і не хаваюць свайго абурэння.
МГ belsat.eu