Транзіт расейскай нафты праз Беларусь па трубаправодзе «Дружба» мусіць цалкам аднавіцца да канца ліпеня. Пра гэта паведаміў 21 траўня старшыня канцэрна «Белнафтахім» Андрэй Рыбакоў.
Кіраўнік канцэрну адзначыў, што ў траўні будзе забяспечана менш за 7 % планаванага транзіту. Мазырскі НПЗ зараз працуе на сваёй магутнасці, «Нафтан» загружаны толькі на 65 % паведамляе БелТА.
Паводле Рыбакова, зараз у Беларусі застаецца каля 1,2 млн тонаў няякаснай нафты, што перашкаджае поўнай загрузцы беларускіх НПЗ ды транзіту нафты. Вывесці забруджаную нафту плануецца не пазней канца ліпеня.
«Адпаведна, у нас будуць цалкам разблакаваныя як пастаўкі на нашы нафтаперапрацоўчыя заводы, так і магчымасці ў поўным аб’ёме забяспечыць транзітны паток», – растлумачыў кіраўнік «Белнафтахіма».
Пры гэтым ён адзначыў, што абмежаванні экспарту беларускіх нафтапрадуктаў, якія ўводзіліся з прычыны няякаснай нафты з РФ, знятыя. «Ёсць толькі адно абавязацельства – гэта забеспячэнне ўнутранага рынку ў поўным абʼёме», – сказаў Андрэй Рыбакоў.
Што датычыць абʼёмаў паставак расейскай нафты ў Беларусь у 2019 годзе, то гэта пытанне будзе абмяркоўвацца ў першай дэкадзе чэрвеня.
МГ belsat.eu
