Сустаршыня БХД выходзіў са свайго дому, калі яго затрымалі АМАПаўцы. Палітыка даставілі ў РУУС Цэнтральнага раёну.
26 снежня, каля пад’езду ўласнага дому быў затрыманы сустаршыня БХД Павел Севярынец. Як паведамляе ў Facebook жонка палітыка Вольга Севярынец, АМАПаўцы даставілі Паўла ў РУУС Цэнтральнага раёну.
Таксама ў чацвер працягваецца судовы канвеер над удзельнікамі масавых акцыяў, якія праходзілі ў Менску 7-8 снежня. Цягам дня, як паведамляе праваабарончы цэнтр «Вясна», адбудзецца 15 судовых паседжанняў.
У судзе Маскоўскага раёну Менску на 30 базавых велічыняў (765 рублёў) асудзілі Наталлю Саматый. Такі ж штраф прысудзілі Алесю Лагвінцу, Андрэю Войнічу, Ірыне Шчаснай.
Акрамя таго суд ужо разгледзеў справу ў дачыненні да Віктара Кавалькова (айцец Вікенцій). Суддзя Маскоўскага суду прысудзіў яму штраф у памеры 30 базавых велічыняў.
Актывістку Алену Талстую за ўдзел у акцыях 7 і 8 снежня асудзілі на 5 дзён адміністратыўнага арышту і акрамя таго аштрафавалі на 50 базавых велічыняў (1275 рублёў). Алену Талстую арыштавалі ў залі суда. Актывістка на знак пратэсту аб’явіла галадоўку.
Штраф у памеры 50 базавых велічыняў атрымаў і Зміцер Казакевіч.
СК belsat.eu