З серыялу «Чарнобыль» выразалі сцэну, якая распавядала пра першамайскі парад у Менску. Пра гэта стваральнік серыялу Крэйг Мэйзін распавёў у інтэрв’ю «The Hollywood Reporter».
Як адзначыў сцэнарыст, сцэну давялося выразаць з прычыны абмежаванняў хронаметражу. Але ён хацеў уставіць яе назад.
«У другой серыі персанаж Эмілі Ўотсан прыходзіць да партыйнага чыноўніка, які кажа ёй, што няма ніякай праблемы. У наступнай сцэне мы бачым, як гэты чыноўнік па тэлефоне спрабуе ўгаварыць партыйнае кіраўніцтва дазволіць яму адмяніць дэманстрацыю 1 траўня ў Менску праз радыяцыю, але яны яму не дазваляюць. Ён нічога не можа зрабіць з гэтым, і вымушаны сам удзельнічаць у парадзе», – расказаў Крэйг Мэйзін.
Стваральнік серыялу адзначыў, што ў Менску і Кіеве сапраўды 1 траўня прайшлі парады, у якіх людзі, уключна з дзецьмі, маршыравалі па вуліцах, не ведаючы пра радыеактыўны выкід за чатыры дні да таго.
МГ belsat.eu