З апытання, праведзенага Усерасейскім цэнтрам даследавання грамадскага меркавання (ВЦИОМ), вынікае, што найбольш папулярны замежны палітык у жыхароў Расеі – Аляксандр Лукашэнка.
Пра гэта газеце «Известия» паведаміў генеральны дырэктар статыстычнага ведамства Валерый Фёдараў.
Паводле слоў Фёдарава, такое ўспрыманне ў жыхароў Расеі назіраецца не першы раз. Раней з Лукашэнкам канкураваў першы прэзідэнт Казахстана Нурсултан Назарбаеў, аднак апошні «некалькі адышоў у цень».
Папулярнасць беларускага кіраўніка Фёдараў патлумачыў тым, што яго палітыка «пры ўсіх але» успрымаецца як прарасейская, а не празаходняя.
«Па-другое, ён успрымаецца як сапраўдны руплівы гаспадар, як чалавек, які выбудаваў стабільную эканоміку, якая дынамічна развіваецца, і забяспечвае досыць жорсткі парадак у сваёй краіне», – падкрэсліў Фёдараў.
Акрамя таго, адзначыў Фёдараў, у Расеі існуе і «маргінальны пункт гледжання», згодна з якім Лукашэнка – «дзіўны, смешны і абсалютна несучасны дзівак з мінулага стагоддзя».
Паводле Фёдарава, такое меркаванне распаўсюджана сярод палітычна індыферэнтнай расейскай моладзі.
Нагадаем, мінулы год завяршыўся складанымі перамовамі паміж Лукашэнкам і Пуціным, у выніку не была падпісаная 31-я «дарожная мапа» інтэграцыі і не дасягнутая дамоўленасць па коштах на расейскую сырую нафту для Беларусі.
КА belsat.eu