Кіраўнікоў усіх шасці краінаў «Усходняга партнёрства» запрасілі на штогадовую сустрэчу ініцыятывы, якая пройдзе 13 траўня ў Бруселі. Пра гэта паведамляе «New Europe». Сярод запрошаных ёсць і кіраўнік Беларусі.
Прымаць сустрэчу будзе прэзідэнт Рады Еўрапейскага Звязу Дональд Туск. На ёй плануецца абмеркаваць неабходнасць прагрэсу ў такіх галінах, як вяршэнства права, кіраванне і барацьба з карупцыяй.
Як перадае выданне са спасылкай на высокапастаўленага чыноўніка ЕЗ, Усходняе Партнёрства развівалася на фоне не заўсёды лёгка палітычнага кантэксту і праблем бяспекі краін-партнёраў. Тым не менш, паводле яго, ініцыятыва не прызначаная для таго, каб краіны рабілі выбар паміж Расеяй і Еўразвязам, але ўзаемадзейнічалі на падставе добраахвотнай супрацы.
Не выключаецца, што міністры замежных спраў ЕЗ ухваляць праграму развіцця Усходняга Партнёрства пасля 2020 года.
Нагадаем, што прэзідэнт Польшчы Анджэй Дуда запрасіў Аляксандра Лукашэнку на мерапрыемствы з нагоды 80-годдзя пачатку Другой сусветнай вайны. Вялікая міжнародная сустрэча адбудзецца 1 верасня ў Варшаве. А 16 красавіка Аляксандр Лукашэнка наведае з афіцыйным візітам Турцыю.
Усходняе партнёрства – праект Еўрапейскага звязу, мэтай якога ёсць развіццё інтэграцыйных сувязяў ЕЗ з шасцю краінамі былога СССР: Азербайджанам, Арменіяй, Беларуссю, Грузіяй, Малдовай і Украінай.
МГ belsat.eu