Урад Швецыі ў афіцыйных стасунках больш не будзе называць Беларусь па-шведску «Белай Расеяй» – «Vitryssland». Замест гэтага будзе ўжывацца назва «Belarus», паведаміла міністр замежных справаў Швецыі Ан Ліндэ ў артыкуле ў «Dagens Nyheter».
Кіраўніца МЗС адзначыла, што шведскае МЗС такім чынам аддае прызнанне беларускай грамадзянскай супольнасці і людзям, якія даўно хацелі падкрэсліць нацыянальную ідэнтычнасць і суверэнітэт сваёй краіны.
Ліндэ адзначае, што міністэрства адмаўляецца ад тэрміну «Vitryssland», што можа можа выклікаць асацыяцыі з Расеяй (Ryssland). Разам з тым «Belarus» з коранем «Rus» не датычыць да Расеі, а з’яўляецца сярэднявечнай назвай земляў ва Усходняй Еўропе.
Паведамленне супала ў часе з візітам Ан Ліндэ ў Менск разам з яе фінскім калегам Пэкам Хаавістам.
15 кастрычніка згуртаванне беларускай дыяспары ў Швецыі «Sveriges Belarusier» зладзіла ў цэнтры Стакгольму пікет. На ім беларусы заклікалі міністра замежных справаў Ан Ліндэ канчаткова прыбраць з афіцыйнага ўжытку назву Беларусі «Vitryssland», што ў наўпроставым перакладзе азначае «Белая Расея».
МГ belsat.eu
