Беларускія аматары гандболу запусцілі ў YouTube падкаст, прысвечаны гэтаму віду спорту.
Аўтарамі ідэі падкасту з назвай «Штопаный гандбол» ды яго вядоўцамі з’яўляюцца гандбольныя аматары Андрэй Рапапорт і Іван Сапега.
У каментары belsat.eu Іван Сапега адзначыў, што перыядычнасць гандбольнага падкасту пакуль не вызначаная – магчыма, новыя выпускі будуць выходзіць раз на два тыдні або раз на месяц.
«Пляцовак у нас не так шмат, каб нешта абмяркоўваць. Пра гандбол пішуць максімум чалавек 10, калі вельмі аптымістычна падыходзіць да гэтага пытання. Кантэнту не ўсім і не заўсёды хапае. Плюс гэта трошкі іншы фармат, дзе можна абмяркоўваць усе тыя ж тэмы, але больш лёгка. Не саромецца казаць нешта, магчыма, рабіць гэта больш востра», – адзначыў ён.
Паводле суразмоўцы, на запіс плануецца запрашаць лідараў камандаў чэмпіянату Беларусі, гульцоў зборнай, магчыма, трэнераў. Выпускі плануецца прымяркоўваць да значных падзеяў. Сярод тэмаў, якія абмяркоўваліся ў першым падкасце, – шанцы беларускай зборнай адабрацца на Алімпіяду.
МГ belsat.eu