Як дапамагчы людзям сталага веку, якія не могуць выходзіць з дому? IBB разам з Беларускім таварыствам Чырвонага Крыжа запусцілі ініцыятыву «Шчыры абед», якая цешыць іх дастаўкаю смачнай ежы.
Ідэя ініцыятывы прыйшла да працаўнікоў менскага адукацыйнага цэнтру IBB Ларса Шмідта і Таццяны Кнацько, калі яны разважалі, як можна дапамагчы людзям сталага веку падчас пандэміі. Вырашылі выкарыстаць магчымасці, якія ў іх зараз ёсць.
«Пры падтрыманні IBB працуе Гістарычная майстэрня, якая працуе са сведкамі Другой сусветнай вайны. Падчас пандэміі гэтыя людзі трапілі ў асноўную групу рызыкі. На базе IBB працуе рэстарацыя «Вэстфалія». Мы вырашылі, што можам частаваць абедамі адтуль тых, каму зараз патрэбная ежа і ўвага», – кажа Ларс Шмідт.
Грашовае падтрыманне яны знайшлі ў нямецкай каталіцкай арганізацыі Рэновабіс, а з дастаўкаю дапамагаюць Беларускі Чырвоны Крыж і «Яндэкс.Таксі».
Зараз абеды дастаўляюць 35 людзям, але ў чэрвені іх колькасць вырасце да 65. На жаль, праграма не працуе паводле заяўнага прынцыпу. Абеды дастаўляюцца згодна з кантактамі Гістарычнай майстэрні і тэрытарыяльнага цэнтру абслугі насельніцтва Маскоўскага раёну Менску.
Абеды развозяць тры разы на тыдзень, па панядзелках, серадах і пятніцах. Стравы прыгатаваныя згодна з патрэбамі старэйшага арганізму: больш дыетычнае мяса, не шмат спецыяў.
Валанцёры ад Беларускага Чырвонага Крыжа дапамагаюць з дастаўкаю гарачых абедаў. Пакункі яны пакідаюць на спецыяльнай табурэтцы ля дзвярэй, так што атрымальнікам не прыходзіцца нават выходзіць з дому.
«Нашыя валанцёры прайшлі адмысловы інструктаж, ім выдалі сродкі індывідуальнай абароны і экіпаванне. У кожнага ёсць улётка па абароне і прафілактыцы COVID-19», – паведамілі «Белсату» у прэс-службе Беларускага Чырвонага Крыжа.
Па горадзе валанцёры перасоўваюцца на аўтамабілях партнёраў «Яндэкс.Таксі». Перад кожным выездам машыну дэзынфекуюць, кіроўца заўсёды мае сродкі індывідуальнай абароны.
«Мы мяркуем, што зараз асабліва важна дапамагаць арганізацыям, якія дбаюць пра іншых. У межах праекту «Шчыры абед» мы даем бясплатныя паездкі для валанцёраў, якія развозяць гарачыя абеды», – гаворыць Іван Кірсанаў, кіраўнік па развіцці бізнесу «Яндэкс.Таксі» у Беларусі.
У «Яндэкс.Таксі» адзначылі, што кампанія гатовая падтрымаць і іншыя дабрачынныя і сацыяльныя арганізацыі Беларусі.
Сталым людзям важныя ня толькі абеды, але і ўвага ды магчымасць паразмаўляць.
«Мы атрымліваем вельмі добрыя водгукі ад людзей. Зараз сапраўды шмат хто з іх не выходзіць з хаты, таму дастаўка гарачай ежы – гэта выдатнае падтрыманне. Аднак яшчэ ім асабліва прыемна стасавацца з валанцёрамі. Нам часта тэлефануюць і дзякуюць за праект», – цешыцца Таццяна Кнацько.
Арганізатары ня толькі развозяць абеды, але і часам тэматычна падтрымліваюць былых вязняў. 8 траўня, перад Днём Перамогі, яны раздавалі ўрачыстыя паштоўкі і печыва.
«Абеды – гэта важна, аднак увага – галоўны кампанент. Яны вельмі ўсцешаныя, што нехта аб іх думае, з імі размаўляе. Асабліва гэта адчуваецца ў сённяшнія часы, калі людзі знаходзяцца ў ізаляцыі», – падкрэслівае Ларс Шмідт.
Ініцыятыва будзе працаваць да канца ліпеня. Арганізатары спадзяюцца, што за гэты час пандэмія сціхне. Прынамсі, людзі ва ўзросце здолеюць тады выходзіць з хаты.
«Аднак калі сітуацыя не зменіцца, натуральна, што будзем неяк працягваць, – кажа Ларс.
А пакуль што яны проста дапамагаюць валанцёрам развазіць абеды і паралельна працуюць. Думаць пра будучыню рэсурсаў не хапае.
«У нас нават не было часу падумаць, што рабіць з праектам, калі каронавірус не скончыцца!», – смяецца ён.
Ксенія Тарасевіч belsat.eu