Служба бяспекі Украіны расследуе крымінальную справу супраць беларускага памежніка. Пра гэта паведамляе радыё «Свабода».
Працаўніка аператыўна-вышуковага аддзелу Пінскага памежнага атраду Дзяржаўнага памежнага камітэту Беларусі падазраюць у тым, што ён перашкаджаў «законнай дзейнасці Узброеных сілаў Украіны і іншых вайсковых фармаванняў у асаблівы перыяд». За гэта яму пагражае ад 5 да 8 гадоў.
Справу пачалі ў кастрычніку 2019 году пасля таго, як на яго паказаў грамадзянін Украіны, якога беларус нібыта завербаваў для атрымання інфармацыі пра дзейнасць, узбраенне і тэхніку Луцкага атраду памежнікаў, а таксама пра асаблівасці аховы беларуска-ўкраінскай мяжы ў Валынскай ды Ровенскай вобласцях.
Украінец звярнуўся ў СБУ ў ліпені 2018 году ды прызнаўся ў дапамозе «Рэспубліцы Беларусь у правядзенні падрыўной дзейнасці супраць Украіны». Ён паведаміў, што яго завербавалі ў кастрычніку 2017 году ў беларускім пункце пропуску «Невель». СБУ высветліла, што для каардынацыі дзейнасці беларускі памежнік выкарыстоўваў 11 мабільных нумароў.
З 2016 году стала вядома прынамсі пра шэсць выпадкаў нібыта вербавання ўкраінцаў беларускімі спецслужбамі.
МГ belsat.eu
