Сан-Францыска, Мюнхен, Варшава – акцыі салідарнасці з Беларуссю праходзяць па ўсім свеце
У розных гарадах свету праходзяць акцыі салідарнасці з беларускімі дэманстрантамі і пратэсту супраць палітычных рэпрэсіяў у Беларусі.
Гэтак, 21 чэрвеня каля 150 чалавек прыйшлі ў амерыканскім горадзе Сан-Францыска да «Ferry Building» – паромнага тэрміналу ў цэнтру гораду.
У руках пратэстоўцы трымалі плакаты з надпісамі «Я люблю Беларусь», «Спыніце палітычныя рэпрэсіі ў Беларусі», «Свабоду беларускім палітвязням», «Спыніце рэпрэсіі», «Жыцці беларусаў вартыя», «Жыве Беларусь!» і іншыя.
Некаторыя ўдзельнікі акцыі прынеслі адмысловыя плакаты з фактамі пра дзеянні і заявы кіраўніка Беларусі ды з інфармацыяй пра палітычны пераслед у краіне.
Таксама акцыя салідарнасці з Беларуссю ў гэты дзень прайшла ў нямецкім Мюнхене. Тут пратэстоўцы прыйшлі да Генеральнага кансулату Беларусі.
У руках у іх былі плакаты з надпісам «Гаага чакае цябе» ды з інфармацыяй пра важнасць выбарчага права.
Нагадаем, што 21 чэрвеня акцыя ў падтрымку зменаў у Беларусі прайшла ў Варшаве. Тут да беларускай амбасады прыйшлі больш за 1000 чалавек.
20 чэрвеня акцыі салідарнасці з Беларуссю прайшлі ў нямецкіх Берліне і Гамбургу, у ізраільскім Тэль-Авіве. Таксама Беларусь падтрымлівалі ў Вільні, Кіеве, Маскве, Гаазе ды іншых гарадах.
МГ belsat.eu
