Самая дарагая прадстаўніцкая мадэль у свеце. У Лукашэнкі новы «Maybach» за € 1,4 млн
Ля стадыёну «Дынама» ў Менску 30 чэрвеня падчас цырымоніі закрыцця Еўрапейскіх гульняў быў заўважаны новы «Mercedes-Maybach Pullman Guard» з прэзідэнцкімі нумарамі. Пра гэта паведамляе «Комсомольская правда».
Гэтая машына належыць да найноўшага пакалення браняваных лімузінаў кампаніі «Mercedes». Іх пастаўкі пачаліся ў 2018 годзе. На выраб кожнай машыны сыходзіць каля дзевяці месяцаў. Кіроўцу і пасажыраў абараняе бронесталь, сталь у спалучэнні з кеўларам і кулястойкае шкло таўшчынёй больш за 6 сантыметраў.
Расстрэл ва ўпор са штурмавых вінтовак лімузіну не страшны, як і выбух 15 кг трацілу за два метры ад аўтамабіля і за метр над зямлёй.
У інтэр’еры прадугледжаныя бар і масажныя крэслы. Таксама ёсць ахоўная браняваная перагародка, якая аддзяляе VIP-пасажыра ад кіроўцы і целаахоўніка.
Базавая цана браневіка (без уліку сірэнаў, страбаскопаў, гучнагаварыцеляў і іншага індывідуальнага абсталявання) складае € 1,4 млн. Сёння гэта самая дарагая прадстаўніцкая мадэль у свеце.
З 2011 года Аляксандр Лукашэнка выкарыстоўваў браняваны лімузін «Mercedes Pullman Guard».
МГ belsat.eu
