Салат «Цэзар», прыдуманы 95 гадоў таму амерыканска-мексіканскім рэстаратарам Сізарам Кардыні, даўно набыў папулярнасць і сярод беларусаў. Без яго амаль немагчыма ўявіць меню кавярняў і рэстарацыяў, таму мы вырашылі паглядзець, дзе і які салат можна набыць сёння ў Менску.
Паводле сэрвісу «Carte.by», найбольшы выбар салатаў «Цэзар» – па пяць розных варыянтаў – прапаноўваюць толькі чатыры ўстановы: рэстарацыі «Тэраса», «Гаштэт», «Drozdy Club» ды кавярня «Brutto». Ува ўсіх іх ёсць вегетарыянскія варыянты, варыянты з куркай, крэветкамі ды сёмгай або ласосем. «Тэраса» таксама прапаноўвае сырную опцыю. Меню «Brutto» найбольш мясное – тут да куркі і крэветак дадаюць бекон, а ў «Гаштэце» можна пакаштаваць грыбны «Цэзар».
Самы дарагі салат умоўнай базавай камплектацыі падаецца ў рэстарацыі «Bella Rosa» каля ЦУМу. Тут за 178 грамаў салату давядзецца заплаціць 15 рублёў, або 84,27 рубля за кілаграм. Але калі праехаць па праспекце Незалежнасці далей ад цэнтру, дык у «Піт-стопе» ва Уруччы можна набыць самы танны варыянт: 145-грамовая порцыя «Цэзару» тут каштуе 2,3 рубля, або 15,86 рубля за кілаграм. То бок розніца паміж самым дарагім і самым танным варыянтамі складае 68,41 рубля.
Ёсць установы, дзе можна набыць салат з вельмі нечаканымі складнікамі. Напрыклад, кавярня «Бярлога» прапаноўвае «Цэзар» з мідыямі, а «Залатая горка» – з карпача. У рэстарацыі ж «Dolce Vita» можна ўбачыць самы своеасаблівы варыянт – тут і бекон, і кунжут, і нават філе тунца. Каштуе гэта ўсё 31,4 рубля за 280 грамаў. Калі б пры ацэнцы коштаў улічваць не толькі базавую камплектацыю, то гэта, безумоўны, пераможца ў коштах – 112,14 рубля за кілаграм, або амаль на 100 рублёў больш за самы танны варыянт.
Прысутнічае «Цэзар» і ў сэрвісах дастаўкі ежы. Тут разбежка ў порцыях курынага варыянту салату вагаецца прыблізна ад 6 да 10,7 рубля. У «Eda.by» за 12,9 рубля можна замовіць і «Цэзара» з вэнджаным ласосем. А вось найбольшы і найтаннейшы з «Цэзараў» прапаноўвае «E-dostavka». Цэлы кілаграм тут каштуе ўсяго 12,55 рубля.
А піцэрыя «Лісіца» прапаноўвае самы экзатычны варыянт дастаўкі – салат-рол. Каштуе ён 6,9 рубля.
Але колькі абыдзецца прыгатаваць «Цэзара» самастойна дома? Паводле самага першага варыянту, які трапіўся нам у «Google», для прыгатавання неабходныя паўбохана белага хлебу, 95 мл аліўкавага алею, 400 грамаў курынага філе, качан салаты айсберг, 150 грамаў пармезану, 4 зубчыкі часныку, 200 грамаў памідораў чэры, 2 яйкі, 2 маленькія лыжкі гарчыцы, 3 вялікія лыжкі лімоннага соку, соль ды перац. Паводле нашых падлікаў, каштаваць выніковая вялікая порцыя будзе трошкі больш за 11 рублёў.
Увогуле, як адзначыў у каментары Belsat.eu кіраўнік Гільдыі кухараў і шэф-кухараў Беларусі Аляксандр Чыкілеўскі, «Цэзар» дастаткова просты ў гатаванні ды ўсе яго інгрэдыенты ёсць у наяўнасці. Але, мяркуе ён, калі гатаваць салат на аднаго чалавека, а не на вялікую сям’ю або на свята, рабіць гэта не так і выгадна. Бо набыць неабходныя паводле рэцэпту грамы не атрымаецца і давядзецца пераплочваць за лішнія аб’ёмы. «А гэта яшчэ даражэй», – заявіў суразмоўца.
Што датычыць вялікай разбежкі ў коштах на «Цэзар» у кавярнях і рэстарацыях, то існуе шмат фактараў, якія на гэта ўплываюць. Гэтак, у класічны склад уваходзіць салата рамэн, а не айсберг або латук, якімі яе шмат хто спрабуе замяніць.
«І асабліва цяпер, у зімовы час, усе гэтыя салаты дастаткова дарагія. І ўлетку яны не вельмі танныя», – адзначыў Аляксандр Чыкілеўскі.
Важная частка «Цэзару» – соус, у які мусяць уваходзяць уласнаруч зроблены маянэз, анчоусы, сыр пармезан, а не «Dziugas» або іншы замяняльнік, часнык ды іншыя інгрэдыенты. «І кухар, які паважае сябе, вядома, зробіць соус, найбольш набліжаны да арыгіналу. А ў невялікай кавярні няма сэнсу рабіць дарагія соусы ці запраўкі – звычайна дадаецца маянэз з рознымі смакавымі дадаткамі кшталту часныку або соевага соусу. З гэтага і складаецца адпаведны кошт», – сказаў кіраўнік Гільдыі кухараў і шэф-кухараў.
Але галоўнае, падсумаваў Аляксандр Чыкілеўскі, – гэта вольнае коштаўтварэнне, калі гаспадар любой установы можа паставіць любую цану, адпаведную яе ўзроўню. Таму і кошт у невялікай кавярні ды ў вялікай рэстарацыі ў любым разе будзем розны, падкрэсліў ён. І хоць тэарэтычна маленькая кавярня можа ўсталяваць вялікую цану на салат, але купляць яе ніхто там за такі кошт не будзе, упэўнены эксперт.
МГ belsat.eu