«Час няпросты». У Беларусі новыя дзяржсакратар Савету бяспекі ды міністр абароны
У Беларусі змянілася кіраўніцтва вайсковых ведамстваў. Адпаведныя рашэнні прыняў Аляксандр Лукашэнка, піша БелТА.
Рашэннем кіраўніка дзяржавы міністр абароны Беларусі генерал-лейтэнант Андрэй Раўкоў, які кіраваў Мінабароны з 2014 года, прызначаны на пасаду дзяржаўнага сакратару Савету бяспекі.
Міністэрства абароны ўзначаліў Віктар Хрэнін, які да гэтага камандаваў войскамі Заходняга аператыўнага камандавання, а кіраўніком Генеральнага штабу стаў Аляксандр Вальфовіч, былы першы намеснік начальніка Генштабу.
«Натуральна, вызваліліся пасады, і я не палічыў патрэбным з гэтым цягнуць. Мы людзі ваенныя, час няпросты. Гэта не значыць, што заўтра вайна і нам з кімсьці прыйдзецца ваяваць – ні ў якім разе. Але ваенная арганізацыя не трывае нявызначанасці», – падкрэсліў Лукашэнка.
Да нядаўняга часу дзяржаўны сакратаром Савету бяспекі Беларусі быў Станіслаў Зась. Але 1 студзеня 2020 года ён стаў генеральны сакратаром Арганізацыі дамовы аб калектыўнай бяспецы (АДКБ).
- Генерал-лейтэнант Андрэй Раўкоў нарадзіўся ў 1967 годзе ў Бешанковіцкім раёне. Скончыў Менскую сувораўскую ваенную вучэльню, Маскоўскую найвышэйшую агульнавайсковую камандную вучэльню, камандна-штабны факультэт Ваеннай акадэміі Беларусі ды Ваенную акадэмію генеральнага штаба Узброеных Сіл Расеі. Камандаваў войскамі Паўночна-Заходняга аператыўнага камандавання з 2012 па 2014 год. У лістападзе 2014 года быў прызначаны міністрам абароны.
- Генерал-маёр Віктар Хрэнін нарадзіўся ў 1971 гадзе ў Наваградку на Гарадзеншчыне. Скончыў Усурыйскую сувораўскую вучэльню ў 1988 годзе, у 1992 годзе скончыў Омскую вышэйшую агульнавайсковую камандную вучэльню імя Фрунзе, у 2005 годзе – Вайсковую Акадэмію Рэспублікі Беларусь.
МГ belsat.eu
