Уладзімір Пуцін падчас інтэрв’ю арабскім тэлеканалам выказаў сваё меркаванне пра сітуацыю ў Сірыі. Кіраўнік Крамля таксама агучыў умову, згодна якой войскі Расеі будуць выведзеныя з гэтай краіны.
«Той, хто знаходзіцца на тэрыторыі іншай дзяржавы незаконна, у дадзеным выпадку на тэрыторыі Сірыі, павінен пакінуць гэты рэгіён, і гэта тычыцца ўсіх дзяржаваў. Калі ў будучым легітымнае кіраўніцтва Сірыі скажа, што яно больш не мае патрэбы ў знаходжанні расейскіх узброеных сілаў у гэтай краіне, то гэта будзе тычыцца і Расеі», – цытуе агенцтва ТАСС словы Уладзіміра Пуціна.
Расея ўвяла свае войскі ў Сірыю восенню 2015 года. Прычым Крэмль прымае ўдзел у грамадзянскай вайне ў Сірыі на баку рэжыму Башара аль-Асада. Расейскія самалёты наносілі авіяўдары не столькі па пазіцыях баевікоў «Ісламскай дзяржавы», колькі па паўстанцах. У выніку авіяцыя краінаў саюзнікаў пачала знішчаць самалёты Асада.
У Крамлі неаднаразова раней заяўлялі пра завяршэнне аперацыі ў Дамаску, але дагэтуль расейскія жаўнеры застаюцца ў Сірыі. У той час як краіны NATO, ЗША вяртаюць сваіх вайскоўцаў дадому з гэтай краіны.
Паводле афіцыйных звестак Мінабароны Расеі, за час аперацыі ў Сірыі загінулі каля 40 расейскіх вайскоўцаў.
СК belsat.eu
