Уладзімір Пуцін падчас сёлетняга велікоднага набажэнства застанецца ўдома. Гэта адбудзецца ўпершыню падчас ягонага кіравання Расеяй, падае ТАСС. Аляксандр Лукашэнка заяўляў, што плануе наведаць святыню.
Прэс-сакратар кіраўніка Расеі Дзмітрый Пяскоў распавёў, што Уладзімір Пуцін не пойдзе на велікоднае набажэнства ў святыню.
«Застанецца ўдома. Як вы ведаеце, ён цяпер жыве і працуе ў дзяржаўнай рэзідэнцыі Нова-Агарова, – сказаў прадстаўнік Крамля. – Прэзідэнт увечары паставіць свечку ў невялікай капліцы, якая знаходзіцца на тэрыторыі гэтай дзяржаўнай рэзідэнцыі».
Пяскоў дадаў, што з нагоды Вялікадня прэзідэнт і Патрыярх Маскоўскі і ўсяе Русі Кірыл абмяняюцца віншаваннямі.
Пуцін традыцыйна наведвае велікодныя набажэнствы ў святыні Хрыста Збаўцы ў Маскве. Пры гэтым кіраўнік дзяржавы двойчы ўдзельнічаў у велікодных урачыстасцях па-за сталіцай: у 2000 годзе ён прымаў удзел у набажэнстве ў Ісакіеўскім саборы Санкт–Пецярбурга, а ў 2003-м, знаходзячыся на Вялікдзень з візітам у Таджыкістане, наведаў службу ў Свята-Мікольскім саборы ў Душанбэ.
У пропаведзі ў святыні Хрыста Збаўцы ў Вербную нядзелю Патрыярх Маскоўскі і ўсяе Русі Кірыл заклікаў вернікаў заставацца ўдома і глядзець Набажэнствы па тэлевізары, выконваючы ўведзеныя для барацьбы з распаўсюджваннем каронавіруса санітарныя прадпісанні.
Пазней прадстаўнікі Беларускай праваслаўнай царквы звярнуліся да вернікаў з просьбай устрымацца ад наведвання набажэнстваў у сувязі з успышкаю каронавіруса.
Аляксандр Лукашэнка 13 красавіка заяўляў, што пойдзе на Вялікдзень у царкву.
«Мы дарогу да святыні нікому не закрываем. Гэта маё цвёрдае патрабаванне. Мы нікому нічога не забараняем. Мы гэта давялі да кіраўніцтва ўсіх цэркваў, канфесіяў, у тым ліку і праваслаўнай царквы. Хто хоча, той памоліцца, сходзіць у святыню. Я буду ў царкве. Гэта мая традыцыя. Я рэдка бываю, але на Каляды і Вялікдзень я заўсёды ў царкве. Звычайна ў раёны выязджаю, бываю ў гэтых маленькіх цэркаўка», – заявіў Лукашэнка.
Разам з тым ён звярнуўся з заклікам да святароў з улікам наяўнага становішча не трымаць людзей доўга ў святынях ды прадугледзець адмысловыя месцы для традыцыйнага асвячэння яек і кулічоў, каб сталы былі не ў памяшканнях, а на адкрытым паветры.
«Свечку паставіў, выйшаў і пайшоў. Усе пропаведзі лепш каля святыні», – дадаў Лукашэнка.
ДД belsat.eu