Прэзідэнт Расеі Уладзімір Пуцін 5 сакавіка правёў у Крамлі перамовы з прэзідэнтам Турцыі Рэджэпам Таіпам Эрдаганам
Расейска-турэцкія перамовы працягваліся каля шасці гадзін. Падчас іх бакі разгледзелі праблематыку і магчымыя шляхі ўрэгулявання сірыйскага крызісу з улікам абвастрэння сітуацыі каля Ідлібу, паведамілі ў Крамлі.
Па выніках перамоваў Пуцін і Эрдаган узгаднілі сумесны дакумент, які замацоўвае дамоўленасці па нармалізацыі сітуацыі ў Ідлібе.
Як піша РИА Новости, пагадненне ўключае ў сябе наступныя пункты:
- спыненне ўсіх баявых дзеянняў па дзейнай лініі судакранання апоўначы 6 сакавіка;
- Расея і Турцыя ствараюць калідор бяспекі шырынёй шэсць кіламетраў на поўнач і поўдзень ад трасы М-4 у Сірыі;
- Расея і Турцыя з 15 сакавіка пачынаюць сумеснае патруляванне ўздоўж трасы М-4.
Пуцін выказаў упэўненасць, што дамоўленасці стануць асновай урэгулявання сітуацыі ў Ідлібе.
27 лютага ў сірыйскай правінцыі Ідліб у выніку авіяўдару сірыйскай авіяцыі загінулі больш за 30 вайскоўцаў Турцыі, яшчэ больш за 30 чалавек шпіталізаваныя з раненнямі рознай цяжкасці.
У выніку 1 сакавіка Міністэрства абароны Турцыі абвясціла пра пачатак вайсковай аперацыі супраць войскаў прэзідэнта Башара аль-Асада ў Сірыі.
МГ belsat.eu
