Прыехалі аздаравіцца – вярнуліся з каронавірусам. Санаторыі ўсцяж працуюць падчас пандэміі
Усё больш інфікаваных каронавірусам людзей выяўляюцца ў санаторыях. Мы згадалі вядомыя выпадкі і спраўдзілі сённяшнюю сітуацыю ў аздараўляльных установах.
Міністэрства аховы здароўя 16 красавіка зладзіла трансляцыю «Найбольш актуальныя тэмы і пытанні пра COVID-19». На ёй дырэктар Рэспубліканскага цэнтру аздараўлення і санітарна-курортнага лячэння Генадзь Балбатоўскі паведаміў пра працу санаторыяў падчас пандэміі:
«У санаторыях адмененыя масавыя мерапрыемствы. Рэжым харчавання па магчымасці адбываецца ў некалькі зменаў з рассадкай на інтэрвалы ў паўтары-два метры ад сталоў. Адбываецца штодзённая дэзынфекцыя».
Перад засяленнем спраўджваюць, ці ёсць у гасцей прыкметы захворвання. Накіраванне ў санаторыі абмежавалі, пажылых людзей і інвалідаў увогуле не будуць туды адпраўляць.
«На каранціне санаторна-курортных установаў у нас няма. Ёсць некалькі санаторыяў, якія працуюць у абмежаваным рэжыме, і два санаторыі, якія не працуюць па рашэнню ўласніка з-за нізкай загрузкі», – кажа Генадзь Балбатоўскі.
Тым часам «Радыё Свабода» перадавала інфармацыю работніцы санаторыя «Пад’ельнікі» пра тое, што ўстанову «зачынілі на каранцін». Тады дырэктар установы Андрэй Грудзіна пацвердзіў адзін выпадак інфікавання.
Belsat.eu спраўдзіў актуальную сітуацыю ў санаторыі. Галоўны лекар Андрэй Грудзіна адмовіўся каментаваць, а намесніца дырэктара па маркетынгу Любоў Камеш пра колькасць выяўленых у санаторыі інфікаваных не сказала. Але паведаміла:
«Літаральна заўтра ад нас з’язджаюць апошнія госці, і мы прыкрываемся прыкладна да 15 траўня».
Трагедыя пасля адпачынку
Найбольш сумная сітуацыя ў санаторыі «Пралеска». Бядой абярнуўся адпачынак 70-гадовага мужчыны, які памёр ад пнеўманіі 5 красавіка. Уначы на 2 красавіка, паводле «Нашай Нівы», памёр работнік санаторыя «Пралеска». Мужчына таксама хварэў на пнеўманію.
Вядома пра інфікаваную на каронавірус дырэктарку сярэдняй школы ў вёсцы Вялікая Ухалода Марыну Сіўчык, якая праз дзень пасля вяртання з санаторыю адчула сімптомы захворвання. Жанчына паведаміла нам, што зараз адчувае сябе добра і чакае на вынікі аналізаў. Спадзяецца заўтра вярнуцца дадому.
– Зараз пацыенты не прыязджаюць. Часова, да 30 красавіка, рэалізацыі пуцёвак пакуль што няма. Людзі ва ўзросце не накіроўваюцца ў санаторыі. Працоўнае насельніцтва будзе прыязджаць па тэрытарыяльным прынцыпе. Самае галоўнае: у санаторый чалавек едзе дабравольна. Ніхто нікога ані на заводах, ані ў школах, ані ў больніцах не накіроўвае, – распавёў Belsat.eu галоўны лекар санаторыя «Пралеска» Сяргей Падкавыраў.
– Ці ёсць новыя выпадкі каронавірусу?
– У нас усё спакойна. Абсалютна нічога новага няма. Персанал у мяне, дзякуй Богу, усе на месцы.
(Не)аздараўляльныя ўстановы
Падобнае здаралася ў санаторыях па ўсёй Беларусі. Напрыклад, выявілі каронавірус у 25-гадовай жанчыны, якая адпачывала ў санаторыі «Алеся». Загадчык філіялам «Санаторый «Алеся» Вячаслаў Зайцаў паведаміў Belsat.eu, што санаторый працуе, але новых гасцей не прымае да 20 красавіка:
– Пакуль што нічога не было. Усе пробы, узятыя ў кантактных асобаў, адмоўныя. Паўторных вынікаў аналізаў яшчэ няма.
10 красавіка бацьку беларускага драматурга Андрэя Курэйчыка паклалі ў шпіталь, бо выявілі каронавірус. Мужчына адпачываў у санаторыі МУС, дзе знайшлі інфікаванага чалавека. Ва ўстанове каментар Belsat.eu не далі, але сітуацыю ў санаторыі пракаментаваў Міністр аховы здароўя Уладзімір Каранік на брыфінгу Міністэрства аховы здароўя 17 красавіка:
«Што датычыць Мядзельскага раёну, 7 красавіка быў зарэгістраваны выпадак інфікавання ў адным з санаторыяў. Сёння асяродак, з нашага пункту гледжання, лакалізаваны. 65 пацверджаных выпадкаў. 25 – гэта жыхары Мядзельскага раёну. Астатнія – прыезджыя».
Каронавірус знайшлі і ў жанчыны, якая адпачывала ў санаторыі «Белая Вежа». На тэлефанаванні нашага карэспандэнта ў гэтай установе не адказвалі.
У Лепельскім вайсковым санаторыі адпачываў расеец з каронавірусам. Дырэктар санаторыя Міхаіл Лях сказаў Belsat.eu, што новых выпадкаў не было, заезды гасцей працягваюцца, але маленькія:
«Мы ўзмацнілі прыём: вымярэнне тэмпературы, вызначэнне схаванай пнеўманіі».
Пра тое, ці могуць санаторыі стаць асяродкам эпідэміі, мы паразмаўлялі з рэдактаркай TOURSOYUZ.BY Ліліяй Кобзік:
«У нас жа няма агульнага каранціну ў краіне, у нас жа нічога не зачынена. Я не бачу сэнсу зачыняць толькі санаторыі пры тым, што ўсё адчынена. Чым адрозніваецца санаторый ад нейкага працоўнага калектыву? Зараз у санаторыі людзей вельмі мала. Плюс усё ж такі гэта прырода, свежае паветра. Людзі не зачыненыя ў сваіх нумарах, яны гуляюць. Выпадкі зʼяўляюцца, але ж яны і ў арміі зʼяўляюцца. Безумоўна, яны там будуць, але масавага заражэння, наколькі я разумею, там не адбываецца, таму што там масавасці ніякай няма».
Попыт на пуцёўкі расце
Так ці інакш, медыкі просяць людзей заставацца ўдома падчас эпідэміі. Нягледзячы на гэта, падчас вышэйузгаданай трансляцыі Генадзь Балбатоўскі хваліўся тым, што попыт на пуцёўкі ў беларусаў расце:
«Узровень рэалізацыі паслуг і пуцёвак на ўнутраным рынку павялічыўся. Свабодная рэалізацыя павялічылася на 70 % сярод грамадзянаў Рэспублікі Беларусь».
Гэта не дзівіць – Генадзь Балбатоўскі паведаміў, што амаль усе санаторыі панізілі кошты на 10-40 адсоткаў:
«Уласнікі прымаюць меры па актывізацыі працы на ўнутраны рынак. Загрузка ў санаторыях па ўсёй краіне невялікая, каля 40 %. Штогод больш за 200 тысяч замежных грамадзянаў адпачывалі ў нашых санаторыях, таму ва ўмовах зачыненых межаў мы шукаем варыянты па кампенсацыі гэтага кантынгенту».
ДЗ Belsat.eu
