«Пішуць, што можна піць, але мы не давяраем» У Менску працягваюць вазіць ваду ў два раёны
Наколькі гэтая вада цяпер патрэбная, чытайце ў нашым рэпартажы.
У суботу, 27 чэрвеня, УП «Менскводаканал» зняў забарону на карыстанне вадой з-пад крана. Але на ўсялякі выпадак арганізацыя працягвае пастаўляць яе ў праблемныя мікрараёны.
Адзінокая машына з надпісам «Малако» стаіць на паркоўцы ля дзіцячай інфекцыйнай больніцы. Вада ў машыне, паводле кіроўцы, артэзіянская – з крыніцы на вуліцы Гурскага (маецца на ўвазе водазабор №2 «Пятроўшчына», які забяспечвае частку Маскоўскага раёну водаправоднай вадой і дзе цяпер арганізавана кругласуткавая раздачы вады). Ані чэргаў, ані ажыятажу.
Праз некалькі кварталаў адсюль гэтак жа самотна стаіць яшчэ адна машына з вадой. Час ад часу сюды падыходзяць людзі з бутэлькамі і самастойна наліваюць ваду з Бараўлянаў. У кабіне спіць кіроўца. Прачнуўшыся, ён расказвае, што стаяць тут будзе да вечара, а наконт заўтра не ведае.
«Пішуць, быццам бы можна ўжо піць. Але мы не давяраем», – кажа жанчына сярэдніх год з двума бутэлькамі ў руках.
Каля яе спыняецца іншая і пярэчыць:
«А я наліла гэтую ваду з цыстэрны ў імбрык і ў мяне плёнка з’явілася, таму не ведаю…»
У службе 115 таксама не ведаюць, як доўга будуць яшчэ вазіць ваду менчукам, але падкрэсліваюць, што абмежаванні ўжо знятыя. Па тэлефонах кругласуткавай дыспетчарскай службы УП «Менскводаправод» так ніхто не адказаў.
У дварах непадалёк ад станцыі метро «Пушкінская» ваду разліваюць ажно з Капыльскага раёну. Людзі, што набіраюць свае бутэлькі, скардзяцца, што дома ўсё яшчэ чуюць лёгкі пах. Сталы мужчына тлумачыць свой прыход проста: «Бо трэба сябе паберагчы, мала гэтага каронавіруса, дык яшчэ і вада».
Наста Кахановіч Belsat.eu
