У выніку пажару ў Адэскім каледжы эканомікі, які ўспыхнуў 4 снежня, загінулі 12 асобаў, усяго пацярпелі 30 чалавек. У шпіталях застаецца дзевяць. Яшчэ чацвёра лічацца зніклымі, аднак надзеі, што іх знойдуць жывымі, – няма, паведамляе Дзяржаўная служба па надзвычайных сітуацыях.
Мяркуецца, што прычынай маштабнага пажару ў цэнтры Адэсы, які ўзнік раніцай 4 снежня, магла стаць старая праводка. Паводле неафіцыйнай інфармацыі, яе не змянялі з 1966 года. Вядома, што ўзгаранне адбылося ў офісным памяшканні, паведамляе segodnya.ua.
Падчас узнікнення пажару ў будынку знаходзілася больш за 400 чалавек. Частка з іх была адрэзаная ад выхадаў. Людзей ратавалі з дапамогай пажарных лесвіц і аўтапад’ёмнікаў, піша nv.ua.
Да гэтага часу існуе пагроза, што сцены будынку могуць абрынуцца. З пачатку разбору завалаў вывезлі больш за тысячу кубічных метраў будаўнічых канструкцыяў. Выратаваць атрымалася 40 асобаў, паведамляюць выратавальнікі.
Улады гораду вядуць расследаванне прычынаў пажару. Высвятляюцца вінаватыя ў надзвычайным здарэнні, якое пацягнула смерці людзей.
8 снежня ва Украіне прэзідэнт Уладзімір Зяленскі аб’явіў нацыянальны траўр.
СК belsat.eu