Севярынец парэзаў руку на знак пратэсту супраць катаванняў. Яму далі яшчэ 15 содняў
У судзе Фрунзенскага раёна ў 11:00 распачаўся разгляд чарговай адміністратыўнай справы супраць Паўла Севярынца. Пра гэта паведамляе Праваабарончы цэнтр «Вясна».
Палітыка ў суд не даставілі, разгляд справы праходзіць праз Skype-канферэнцыю. На пачатку пасяджэння Павел паказаў сваю руку, на якой былі заўважны парэзы.
«Я парэзаў руку ў знак пратэсту. Мяне трымаюць у карцары 10 дзён без рэчаў!» – растлумачыў палітык.
Павел не ўскрываў сабе вены, ён парэзаў тыльны бок рукі ў знак пратэсту, каб прыцягнуць увагу да беззаконня
Opublikowany przez Вольга Севярынец Czwartek, 18 czerwca 2020
Севярынец заявіў хадайніцтва аб тым, каб яго вызвалілі, бо ўмовы ўтрымання з’яўляюцца нечалавечымі.
«Магу адказваць на пытанні, калі буду на свабодзе», – заявіў палітык. «Вы ўтрымліваецеся па іншай справе», – адмовіў суддзя.
Севярынца судзяць паводле 23.34 КаАП (Парушэнне парадку арганізацыі або правядзення масавых мерапрыемстваў). Падставай для складання пратаколаў стаў удзел Севярынца ў перадвыбарчым пікеце ў Менску 30 траўня і ў Віцебску 31 траўня. Сваёй віны ён не прызнае. Палітык указвае на тое, што ўсё праходзіла ў рамках легальных пікетаў па зборы подпісаў і пра гэта былі адпаведныя дамоўленасці з ініцыятыўнымі групамі.
«На Дана Мол (гандлёвы цэнтр у Менску, каля якога прайшоў першы заўважаны пікет па зборы подпісаў за Аляксандра Лукашэнку –заўв.) таксама былі сцягі і апаратура. Чаму іх не караюць? Чаму я сяджу ў карцары, без вады, без прагулак, без асабістых рэчаў? За што гэта? Мне даюць суткі і суткі», – абурыўся Севярынец.
Ён падкрэсліў умовы свайго ўтрымання: ляжаць можна толькі з 22 да 6 гадзін, пакой 2 на 3 метра, вельмі холадна.
«7 чэрвеня мяне даставілі ў ЦІП. Восьмага чэрвеня мяне пасадзілі ў ІЧУ (ізалятар часовага ўтрымання правапарушальнікаў) у карцар. Забралі зубную пасту і шчотку. Тут няма вады наагул, яна адключаная. [Таму] мне давялося рэзаць вены, пратэстуючы. Ніколі такога не было на «сутках»
«Па якой прычыне вы знаходзіцеся ў карцары?» – удакладняе адвакатка.
«Спачатку мне сказалі, што гэта звычайная камера. Але я ж разумею, [што знаходжуся ў карцары], рэчы мае забралі, перадачы не перадаюць».
Як стала вядома пазней, Паўлу Севярынцу далі яшчэ 15 содняў адміністратыўнага арышту. Палітык знаходзіцца за кратамі з 7 чэрвеня.
***
На гэтым тыдні пакараныя адміністратыўным арыштам актывісты заяўлялі пра катаванні ў Цэнтры ізаляцыі правапарушальнікаў на Акрэсціна. Максім Урбановіч распавёў журналістам, што ў зняволеных адбіраюць матрацы, забараняюць ляжаць, на падлогу камеры штодня выліваюць вядро з хлёркаю, якую ж льюць на асабістыя рэчы. Харчаванне было такое кепскае, што ён неаднаразова адмаўляўся ад вячэры. Апошнія дні Максіму прышлося сядзець у адной камеры з чалавекам, хворым на каросту. Актывіст адзначае, што раней такога не было. «Я сядзеў перад Новы годам, дык тады адміністрацыя намагалася прытрымлівацца рэжыму. Зараз жа – суцэльны псіхалагічны ціск», – кажа ён.
ІІ belsat.eu
